تطوع معنا

قصة أميرة

أنا إسمي أميرة. أنا خجولة وعندي عدد محدود من الأصدقاء. ولأني كنت بأذاكر وبس ما كانش عندي فرصة أوسع دايرتي الاجتماعية.

بابا وماما شجعوني إني أخصص وقت علشان أمارس فيه بعض الهوايات أو الرياضات. وفعلا سمعت نصيحتهم بس بعد فترة فقدت اهتمامي لأن مفيش حد كان بيشاركني الأنشطة دي غير بابا وماما.

بعد فترة حسيت إني ما استفدتش حاجة من هواياتي ورياضاتي. ما كانش عندي أصدقاء يشاركوني أنشطتي.

بعد كده سمعت عن بادر والدور اللي بتلعبه لمساعدة شباب زيي. عرفت ده من صديقة رحت معاها إجتماع في بادر عن حملة التوعية للتطعيم ضد مرض شلل الأطفال. كانت أول مرة أسمع عن التطوع. حسيت قد إيه انا كنت معزولة عن الناس وعن العالم المحيط بي كله.

أول تجربة لي في التطوع في حياتي كانت حملة التوعية للتطعيم ضد شلل الأطفال. بعد فترة الخبرة دي عملت فرق في شخصيتي وفي إدراكي لأشياء كتير في الحياة وأهم حاجة إتغيرت هي شخصيتي. حسيت إن عندي حاجات كتير أديها للآخرين وإني أقدر أساعدهم و أعمل حاجة مفيدة.  

قررت من الخبرة دي إني أروح وأشارك في فرص تانية. رحت المركز المصري للتطوع وكتبت في طلب التطوع إني باعرف أكتب قصص كهواية من هواياتي واللي ما حسيتش إنها ممكن تكون مفيدة لحد. شجعوني أكتب نص لمسرحية لعرضها في المدارس والحضانات أثناء حملة التوعية للتطعيم ضد شلل الأطفال.

لأول مرة أحس إني موهبتي في الكتابة ممكن تكون مفيدة لحد وإن أطفال كتير ممكن يشاركوني في موهبتي. وشاركت في فرص تطوعية تانية زي التمثيل علي المسرح وكتابة نصوص لعروض مسرحية. بدأت يبقي عندي أصدقاء كتير من اللي شاركوني في التطوع .

ما بقيتش أتكسف من الناس وبقيت اجتماعية أكتر.

عيلتي لاحظوا التغير اللي حصل لي وكمان لاحظوا قد إيه أنا بقيت مستقلة وآرائي في الحياة واضحة.

عايزين تتطوعوا؟

يهدف المركز المصري للتطوع إلى نشر ودعم الحركة التطوعية في مصر ويعمل كآلية للربط بين الشباب راغبي التطوع وخدمة مجتمعاتهم والمؤسسات التي في حاجة لمتطوعين. 

يقوم المركز المصري للتطوع من خلال قاعدة بيانات الكترونية بتسجيل كافة الطلبات المقدمة من الشباب والراغبين في التطوع وعرض كل الفرص المتاحة المقدمة للمركز من الجهات والمؤسسات التي يتعاون معها المركز، ويتم ترشيح عدد من الفرص المناسبة والمتاحة للمتطوع، وكذلك الحال بالنسبة للمؤسسة في حالة الإحتياج إلى متطوعين.

ويتم ترشيح عدد من المتطوعين حسب الإحتياجات المحددة من قبل المؤسسة وتسليمهم خطاب ترشيح من المركز للمؤسسة لإستلام الفرص وبدء العمل التطوعي مع المؤسسة.

لوعاوز تتطوع من المركز المصري للتطوع، إملأ الإستمارة على الموقع

المركز المصري للتطوع تابع لجمعية الشباب للسكان والتنمية إحدى شركاء منظمة اليونيسف الرئيسيين.  لمزيد من المعلومات عن الجمعية وبرامجها المختلفة
زور الموقع : www.yapd.org.eg

الإصدارات السابقة