مزارعون بالبحيرة: "لو زودتوا أسعار السماد يبقى بلاها زراعة خالص"

البحيرة – أحمد نصرة:

أبدى عدد كبير من مزارعي محافظة البحيرة تخوفهم الشديد من زيادة أسعار الأسمدة، بعد تردد أنباء عن اتجاه الحكومة إلى الموافقة على مطالب شركات إنتاج الأسمدة بزيادتها بواقع 50%.

وأوضح المزارعون أنهم يواجهون خسائر مادية كبيرة بسبب زيادة تكلفة الإنتاج في جميع مراحله سواء في أسعار البذور والتقاوي، أو المبيدات الزراعية، أو الأيدي العاملة والأدوات، وزيادة أسعار الأسمدة ستزيد الأمر سوءا.

وقال سامي رضوان، مزارع:"أسعار المبيدات زادت الضعف ومش عارفين نعمل إيه، هيزودوا السماد كمان يبقى مش لازم زراعة خالص طالما الفلاح مش على بال حد من المسؤولين".

وقال علي الجيار، مزارع:"الجمعيات الزراعية مش بتدينا كفايتنا من السماد وبنشتري من السوق السوداء الشيكارة اللي بـ 100 بنجيبها بـ 160 جنيه، طيب لما يغلى أكتر من كده هنعمل إيه".

وقال سيد جغلان، مزارع:"بنيجي آخر الموسم نحسب المصاريف نلاقي مكاسبنا كلام فاضي، وأحيان كتيرة بنخسر وما بنلمش حق الزرعة، الرحمة شوية، الفلاح هيجيب منين، ولما نزود في سعر المحصول الناس تهاجمنا".

وقال خالد سميح، تاجر جملة:"السوق زي ما انت شايف قدامك لا بيع ولا شرا، الفلاح عاوز يبيع بالغالي، ومعذور في كده، أمال لو الأسمدة زادت هنعمل إيه، فيه تجار كتير وقفت شغلها، والعملية مش مستحملة".

وقال محمد علي، مدير جمعية زراعية بمركز إيتاي البارود:"حتى الآن لم تصلنا أية تعليمات بخصوص فرض زيادات على أسعار الأسمدة، ونتمنى ألا يحدث ذلك، لكي لا تتضاعف معاناة الفلاح ".

يذكر أن وزارة الزراعة، نفت في بيان لها، اليوم السبت، إقرار أي زيادة في أسعار الأسمدة بالجمعيات الزراعية، وطالبت الجمعيات الزراعية بعدم إضافة أي أعباء مالية على سعر الشيكارة، وأن يتم الإعلان داخل مقار الجمعيات عن أسعار البيع، موضحة أنه يتم بيع الأسمدة داخل الجمعيات بواقع 100 جنيه لشيكارة اليوريا وزن 50 كجم، و95 جنيها لشيكارة سماد النترات وزن 50 كجم.

ويتناقض بيان وزارة الزراعة مع ما قاله مجدي الشراكي، رئيس الجمعية العامة للإصلاح الزراعي بوزارة الزراعة في تصريحات إعلامية، عن موافقة رئيس مجلس الوزراء، المهندس شريف إسماعيل، على زيادة أسعار الأسمدة من 2000 إلى 3000 جنيه للطن.