"مستحيل بعد السنين دي كلها أتّريق عليه".. أحمد فهمي يكشف عن علاقته بهنيدي

كتب- محمد خميس:

كشف الفنان أحمد فهمي عن علاقته بالفنان محمد هنيدي على السوشيال ميديا، قائلًا: "كلنا شغالين في الكوميديا بسبب هنيدي"، مضيفًا: "هنيدي هو اللي فتح لجيل كبير أوي مجال الكوميديا؛ بداية من (إسماعيلية رايح جاي) و(صعيدي في الجامعة الأمريكية) و(همام في أمستردام)، وكله جه بعد كده، ودي حقيقة ماحدش يقدر ينكرها".

وأضاف فهمي، خلال حواره مع برنامج "8 الصبح" المذاع عبر فضائية "دي إم سي"، اليوم الأحد: "مستحيل آجي أنا بعد السنين دي كلها وأتّريق على هنيدي وأكون قاصد.. لا طبعًا، كل اللي بيحصل على السوشيال ميديا هزار، واحنا أصحاب جدًّا، وكنا متجمعين في سفريتين السنة اللي فاتت".

وتابع الفنان: "علاقتي بهنيدي حلوة جدًّا جدًّا، ومهما رميت إفيه عليه هو ذهنه حاضر أكتر منّا بكتير، وناس كتير وجّهت الهزار لأني بادعم كريم أخويا بسبب فيلمه الجديد، ودا جنان رسمي؛ لأن أخويا نفسه مايقدرش يتكلم على هنيدي؛ لأنه حاجة كبيرة، وأنا أفتخر إني باهزر مع هنيدي وهو سايب لي مساحة الهزار دي معاه".