أمير كرارة: "وقَّفوني في كمين بسبب الشنب.. ومراتي اتخضّت منِّي"

كتب- محمد خميس:

علَّق الفنان أمير كرارة على مظهره الجديد دون شنب، قائلًا: "دي كانت مفاجأة للناس كلها"، مضيفًا: "الناس مش عارفاني في الشارع وابتدِت تحصل لي حاجات مدايقاني نفسيًّا بسبب الشنب".

وقال كرارة خلال حواره مع فضائية "دي إم سي"، اليوم الثلاثاء: "من بعد ما عملت مسلسل (كلبش) بأجزائه، كان كل الضباط بيحبوني، ولما كنت بادخل أي كمين في الشارع كان كل حاجة تمام، وباطلّع الرخص، وتمام جدًّا، لكن أول يوم بعد ما حلقت الشنب عشان تصوير مسلسل (الاختيار) راجع من التصوير وعديت على كمين قُلت لمساعدي طلّع الرخص قبل ما ندخل الكمين".

وأضاف الفنان: "الضابط قال فين الرخص بتاعتك؟ ولما طلعنا الرخص قال للمساعد بتشتغل إيه؟ قال له باشتغل مع الأستاذ، راح بص لي باستغراب وقال لي بتشتغل فين يا أستاذ، قُلت له أنا أمير كرارة وبتاع.. ولف ليَّ ناحية الشباك بتاعي عشان يتأكّد، وبيقول لي ليه يا باشا كده بقى؟! والشنب ده كان جزءًا منِّي شخصيًّا".

وتابع كرارة: "كنت حزينًا وأنا باحلق شنبي، بس الفترة اللي جاية كنت باحضّر لمسلسل (الاختيار) وماكنتش عايز أحلق الشنب مرة واحدة، ابتديت أخفّفه عشان آخد على الشكل الجديد، ولحد النهارده مش عارف اتعود على شكلي؛ لأني عمري في حياتي ما حلقت ذقنِي بالموس، ومراتي اتخضّت لما شافتني حلقت.. والمفاجأة إن أنا نفسِي مش عارف أحلق".