نجيب ساويرس: نقيب الموسيقيين مش قيم على أذواق الناس.. أنا مبيعجبنيش غناه

كتب- حسن مرسي:

أبدى المهندس نجيب ساويرس، رجل الأعمال، اعتراضه على قرارات نقابة الموسيقيين بوقف عدد من مؤدي المهرجانات عن الغناء، قائلًا: "من حقي أسمع اللي أنا عايزه، وأنا بحب الغناء الشعبي"، متسائلًا: "لما أخش أخد دش المفروض أخد تصريح من حد أغني إيه أو أسمع مين؟".

وأضاف ساويرس، في مداخلة هاتفية مع الإعلامي عمرو أديب، ببرنامج "الحكاية"، المُذاع عبر فضائية "mbc مصر"، مساء اليوم الجمعة: "الموضوع فيه نفسنة وغيرة، ومصر فيها قانون وكل اللي اتمنعوا رفعوا قضية في القضاء الإداري".

وتابع المهندس نجيب ساويرس: "النقيب مش قيم على أذواق الناس، واحنا أحرار نسمع اللي بنحبه، دورك كنقابة إنك تصرف أو تساعد أو تعالج نجم تابع للنقابة، ولكن لست رقيبًا على المصنفات الفنية، طب أنا مبيعجبنيش غناه".

أضاف ساويرس أنّه كان جادًا في إعلان استعداده استضافة مغني المهرجانات في مهرجان الجونة، وقال: "أنا جد ومش بقول حاجة ومش باعملها".

وتابع المهندس نجيب ساويرس: "إذا كان القانون بيمنح النقيب هذا الحق في منع نوع من الغناء يبقى القانون غلط"، مضيفًا: "الجمهور من يقرر إيه اللي ينفع يتسمع، واللي مش عاجبه المهرجانات يقفل التليفزيون"، متابعًا: "تعبنا من الناس اللي جاية تفرض علينا طريقتها، وقطع الأرزاق ربنا مش بيسامح فيه".