كريم محمود عبدالعزيز: "أبويا كان رافض دخولي التمثيل وقالي بدايتك أحسن مني"

كتب- محمد أبوالمجد:

قال الفنان كريم محمود عبدالعزيز، إنه خجول بطبيعته ويحب الاستماع للاخرين، قائلًا: "بفك مع الوقت"، مشيرًا إلى أن والده الفنان الراحل محمود عبدالعزيز كان لا يريده دخول مجال التمثيل، قائلًا: "كنت بروح مع ابويا المسرح وكنت بسرح في هيبة المكان وانا بشوفه بلبس الشخصيات".

وأضاف "كريم" في حواره لبرنامج "صاحبة السعادة" على فضائية "دي إم سي" اليوم الاثنين: "أبويا وهو قدام الكاميرا كان مختلف عن الحقيقة، وكنت دايمًا بقول نفسي أقف مكانه، ولما شفت أخويا بيمثل مع أبويا في فيلم النمس قلت أنا مكاني مش ورا الكاميرات".

وتابع: "اترشحت لمسلسل شجر الأحلام مع الفنانة دلال عبدالعزيز وأول يوم تمثيل ليا كان يوم أسود وأول مشهد كان مع الفنانة الراحلة دلال عبدالعزيز، وقتها قالتلي مالك في ايه الدنيا عادي وممكن نعيد وابتدى الأمر يسلك معايا".

وأوضح:"أن العمل الثاني لي كان مع الفنان صلاح السعدني ولكن أبويا وقتها قالي مفيش تمثيل عشان الثانوية العامة والمذاكرة"، مؤكدًا: "ابويا قالي هتروح تعتذر عن المسلسل وروحت للمخرج حكيت له كل شيء وقالي إزاي دانت هتبقى ابن صلاح السعدني في المسلسل".

وأردف: "اتفقنا أي مشهد يكون عندي فيه دروس أقول حد يشرب كركدية عشان أعرف أخرج أروح الدروس"، مؤكدًا: "لما أبويا شاف الشغل قالي برافوا وكويس وأنا مش مصدق، وقالي وقتها بدايتك أحسن من بدايتي وواخد فرصة حلوة أوي".