إلهام شاهين: عادل إمام صاحب الفضل الأول.. وصنع مني نجمة في "الهلفوت"

كتب- محمد جمعة:

هنأت الفنانة إلهام شاهين، الزعيم عادل إمام، بذكرى عيد ميلاده، خلال مداخلة هاتفية مع برنامج "حضرة المواطن"، مساء الثلاثاء، قائلة: "بنشكره من كل قلبنا لأنه أمتعنا في حياتنا كلها، واستفدنا وتعلمنا منه كتير".

وأضافت شاهين: "في ناس كثير لهم فضل عليا، يأتي على رأسهم الزعيم عادل إمام صاحب الفضل الأول اللي منحني أول بطولة في حياتي في فيلم الهلفوت، وأول مرة أقف قدام كاميرا كان أمام عادل إمام في فيلم أمهات في المنفى".

وتابعت: "فيلم الهلفوت بقول عليه فيلم لصناعة نجمة، الأستاذ عادل إمام والكاتب الكبير وحيد حامد والمخرج العظيم سمير سيف كانوا بيصنعوا نجمة في هذا الفيلم، وبعد ما كان بيتقال إلهام شاهين ممثلة كويسة بقى يتقال عليا نجمة".

واستطردت: "بعد فيلم الهلفوت، بعتولي فيلم رمضان فوق البركان، وأول ما شافني عادل إمام قالي أنا زعلان منك ليه قبلتي الدور ده؟ قلتله أنا لو قالولي تعالي بس اتمشي قدام الكاميرا مع عادل إمام هاجي. فقالي لأ أنا اللي بقولك متبوظيش اللي عملتيه في الهلفوت، إنتي ممثلة إمكانياتك جامدة، ودور رمضان فوق البركان حتى لو كان طويل أي حد يعمله.. فثقته الغالية كانت كبيرة جدًا بالنسبة ليا".