"مخترتش اسمي والأفيهات من آسر ياسين".. أحمد داوود عن مسلسل "سوتس بالعربي"

كتب- محمد أبوالمجد:

كشف الفنان أحمد داوود، تفاصيل اختياره لمسلسل "سوتس بالعربي"، قائلًا: "لما قريت الورق في الأول مكنتش شوفت النسخة الأصلية، وكنت ما بين اتفرج ومتفرجش لما قريت الجزء العربي".

وقال "داوود" في حواره لبرنامج "مساء دي إم سي" والمذاع على فضائية "دي إم سي" اليوم الأحد: "شفت كام حلقة من الموسم الأول في نسخة سوتس الأجنبية، ومكملتش ومكنش شاغلني فكرة الناس اللي شافوا النسخة الأجنبي وكل شخص له الأداء بتاعه"، موضحًا: "الناس اللي شافوا النسخة الأجنبية لما شافوا أول حلقات في المسلسل قالوا إني بوظت الدور في البداية وفي الآخر بدأوا يتعودوا إني عملت حاجة مختلفة ولذيذة".

وتابع: "اللي مشافش النسخة الأجنبي رد فعلهم في حته تانية، بس استفزني تصريحات الناس لما شافوا أول صورة من المسلسل"، مؤكدًا أن أفيهات الأفلام التي كان يتم ترديدها في مسلسل سوتس بالعربي كان من ابتكار الفنان آسر ياسين، قائلًا: "كان دايس فيها أكتر واشتغلنا على أكتر الافيهات اللي عايشه معانا زي بعتني بكام ياعشري وسلام يا صاحبي".

وأردف: "اسمي في المسلسل جه على اسم ابني آدم بالصدفة وآسر ياسين كذلك اسمه جه على اسم ابنه زين، مختارناش اسامينا"، مؤكدًا: لحظة موت ستي في المسلسل كانت لها ظروف معينة واستحضرت حاجات من الواقع وكان في توفيق من ربنا إني روحت لحته من المطلوب وكنت ببكي بجد في مشهد وفاة ستو في مسلسل سوتس بالعربي".

وأشار، إلى أنه طلب من الفنانة تارا عماد ضربه بشكل حقيقي خلال مشاهد مسلسل "سوتس بالعربي"، قائلًا: "الموقف يستدعي دا لأنه رد فعل طبيعي في المسلسل قولتلها متحرميناش من حاجة حقيقة تتعمل في المسلسل، لأن كل ما ينفع يبقى المشهد بجد بدون ما نأذي بعض هيبقى مفيد".