شيرين تهاجم حسام حبيب: "كذبت عشان أحسن صورته ونفسي يبعد عني"

كتب- محمد أبوالمجد:

علقت الفنانة شيرين عبدالوهاب، على وصفها بصوت مصر، قائلة :"اسم كبير أوي لأن مصر كبيرة ومينفعش يكون لها صوت واحد"، لترد الإعلامية لميس الحديدي، قائلة: "مصر لها أصوات بس أنتي من أحلى الأصوات ولما بتغني كلنا قلبنا بيتخلع معاكي".

وطلبت "شيرين" من مخرج برنامج "كلمة أخيرة" على فضائية "أون إي" اليوم الثلاثاء، بوضع صور لها وشعرها طويل خلال المداخلة، قائلة: "مش بحب المناظر دي وياريت يحطلي صورة وشعري طويل، يا راجل حرام أنا شكلي الشاويش كده".

وأضافت "شيرين" في مداخلة هاتفية للبرنامج: "مش هنسى سؤالك عليا يا لميس ولا سؤال ناس كتير زي ياسمين عبدالعزيز ومنة شلبي وكل الجمهور، بس أنا أسفة إني بتكلم في موضوعي والبلد والناس عندها مشاكل كبير أهم مننا وحاسه إن موضوعي بوخ، ولكن بما أن الناس شاهدة على موضوعي من البداية".

وتابعت: "من البداية عايزة أتأسف واستغفر ربنا على الكذب اللي كذبته عشان أخلي صورة إنسان تبقى كويسة، أنا كذبت مع أن دي أكثر حاجة ربنا مبيحبهاش وأنا مش بحب الكذب".

وأردفت: "كذبت في حاجات كتير عشان أنا بنت أصول وعشان أرفع صورة إنسان ممكن في يوم يروح يتجوز من عائلة تانية، على الأقل يعرف يتجوز وأعرف أخلص منه"، موضحة: "لو كنت أنا فضلت أقول عنه كلام وحش مكنش هيعرف يتجوز وأنا بصراحة نفسي يتجوز ويغور ويبعد عني".