"حبته عقربة".. شيرين تهاجم حسام حبيب: "إنسان قلبه أسود"

كتب- محمد أبوالمجد:

قالت الفنانة شيرين عبدالوهاب: "أنا مرجعتش لحسام حبيب ولكنها كانت محاولة إننا نكمل بس الحكاية مظبطتش، وروحت للمحامي بتاعي وقلت له إزاي أروح النيابة وأنجي حسام من قضية رفع السلاح عليا"، موضحة: "أهل بيت والدته وأخته كان بيدخل لهمم خلال 3 أو 4 سنوات شيكات وعندي شهادة من بنوك معينة مصاريف لأمه واخته حتى شقتهم دفعت فلوسها لحد آخر السنة".

وردت "شيرين" في مداخلة هاتفية لبرنامج "كلمة أخيرة" على فضائية "أون إي" اليوم الثلاثاء، على سؤال الإعلامية لميس الحديدي: "انتي بتحبيه ولا مش بتحبيه"، قائلة: "حبته عقربة مش لاقية حته تنام فيها، أنا بحبه دانا متأذتش في حياتي من إنسان كده دا إنسان قلبه أسود وإنسان فاضي وبيغتاب كل الناس، ولو إنتي كنتي صاحبتي كان طلعك بتحضريني إني أسيبه".

وردت شيرين عبدالوهاب على سؤال الإعلامية لميس الحديدي: "إزاي العربية باسمه ومينفعش يبقى سرقها؟!"، قائلة: "يا فرحتي العربية باسمه يعني هي عربية تين شوكي ؟!"، موضحة: "أنا عندي عربية عالية وجبت عربية مرسيدس عشان الخروجات بتاعت بالليل وقلت هيركبها حسام بس عيب يوقفه ظابط يوريله رخص مكتوب فيها إن العربية باسم مراته".

لتقاطعها لميس الحديدي، قائلة: "شاطرة والله أيه الشطارة دي"، وترد شيرين: "جتني ستين نيلة على خيبتي"، وتعلق لميس: "كملي انتي هتنقطيني"، واستكملت شيرين: "اتفق معايا وبشهود إنه هيعملي توكيل بالبيع عشان يضمن لي حقي كورق ضد شوف الواد الحقاني اللي مش بيقبل على نفسه حاجه وكله كان كلام في الهواء وتمثيل، وأنا اللي هفضل بنت أصول وكريمة وفقيرة وأنا فلوس كلها للناس يارب لو عندي مال قارون".

وأردفت: "أنا بتاعت الناس والفلوس اللي ربنا بيدهالي بتاعت الناس، وخدمتي لأمه وأهل بيته كان عشان خاطر أنا ست متربية لكن إنه يبعت ناس تاخد العربية من قدام بيتي ويتهمني ويقول للمحاسب الخاص بي لو شيرين مخلتنيش أخد العربية هعملها محضر في القسم بسرقة العربية شفت الفجر؟!".

وأوضحت: "كنت بشتري له الأغاني بشيكات وبشهادة كل الشعراء والملحنين تروح البنت اللي شغاله معاه سارة الطباخ تقول على فكرة ممكن يعمل نسخة من الأغاني عشان هي باسمه ؟! وهي ربنا ياخدها"، مؤكدة: "أنا طالعة أقول للناس كذبت عليكم لما بعتلي أسئلة كاذبة ورديت عليها عشان أعمل خير".