أحمد حلمي يروي كيف تسببت سلحفاة في رسوبه بالامتحانات
النجم الكوميدي أحمد حلمي
كتبت- منى الموجي:
كشف النجم الكوميدي أحمد حلمي سبب رسوبه في أحد الامتحانات، مشيرا إلى أن شعاره في المذاكرة كان "للمذاكرة حدود"، حيث اعتاد على تحصيل المواد قبل موعد الامتحان بأيام، كاشفا عن فكرة جاءته ليشعر بقيمة الوقت وهي شرائه "سلحفاة" تشعره ببطء الوقت، وبدلا من أن تكون السلحفاة سببا يساعده على المذاكرة تسببت في رسوبه.
وكتب حلمي على صفحته الرسمية على فيسبوك: "للمذاكرة حدود دي كلمة كنت دايما بقولها وقت الامتحانات.. بس فـ سري طبعا.. انا كنت للأسف متعود أذاكر قبل الامتحان بكام يوم.. ودايما الايام اللي قبل الامتحانات بتبقي قصيره جدا والوقت فيها بيعدي بسرعه غير بقيت أيام السنة".
وأشار حلمي إلى الفكرة التي أوجدها لتشعره بأن الوقت يسير ببطء قائلاً "جاتلي فكرة.. اجيب سلحفه احطها قدامي علي المكتب وانا بذاكر علشان احس ان الوقت بطئ وممل وبيعدي بالراحه.. فيبقي عندي وقت طويل اذاكر فيه لامتحان بكره.. اشتريت سلحفه وحطيتها علي المكتب. وأول لما لمست المكتب لقيتها فوريره جريت لحد اخر المكتب في لحظه .. شكيت انها ممكن تكون سلحفه.. جايز أرنب ومتنكر. !!! او جايز حظي جه في سلحفه مجنونه او راكبها عفريت موتوسيكل. رحت للراجل وقولتله : انا عايز سلحفه بطيئه جداً .. علي ما تخرج من جوه نفسها يكون فات تلات ساعات.. انت ايه!! عايزني اسقط ؟؟"، فمنحه سلحفاة أخرى قائلا "دي بقي هاتخليك من الأوائل".
وتابع حلمي "روحت وحطتها علي المكتب وقعدت باصص لها ومركز معاها . ساعه اتنين تلاته اربعه خمسه سته سبع ساعات السلحفه متحركتش سنتيمتر واحد.. هي دي السلحفه المطلوبه فعلا.. وجيت بقي ابتدي اذاكر لقيت الساعه سبعه الصبح ولازم اروح الامتحان. اتجننت علي السلحفه. مسكتها وابتديت اهزها يمين وشمال علشان تطلع راسها بس مافيش فايده .. ببص علي وشها من الفتحه اللي قدام لقيت فيه نور داخل من الفتحه اللي ورا عند الديل.. شفت الناحيه التانيه من الاوضه.. السلحفه طلعت فاضيه من جوه ومافيهاش سلحفه اصلا.. فارغ بس.. وطبعا سقطت.. بس الامتحان الوحيد اللي كنت واثق اني هانجح فيه كان التعبير. لان سؤال التعبير كان: (كيف تنجز وقتك في عمل مفيد ؟) فجاوبت وقلت : ان لا تعتمد أبدا في نجاحك على سلحفه .. بس برضه سقطت . لان دي اجابه محدش كان ممكن يفهمها غيري انا والسلحفه".
لمتابعة أهم وأحدث الأخبار اشترك الآن في خدمة مصراوي للرسائل القصيرة.. للاشتراك ...اضغط هنا
فيديو قد يعجبك:
