ريهام حجاج: ''حرام يبقى ثمن سمعة الإنسان شوية زيارات''

كتب ـ محمد طعيمة:

أعربت الفنانة الشابة ريهام حجاج عن حزنها لقيام عدد من المواقع الاخبارية بنشر أخبار تصفها فيها بالتعالي على الصحفيين وإصابتها بالغرور بعدما رفضت التسجيل مع بعض القنوات خلال العرض الخاص لفيلم ''كرم الكينج'' الذي تشارك في بطولته.

وكتبت ريهام عبر صفحتها الرسمية على موقع التواصل الاجتماعي ''فيسبوك'': ''حقيقة اللي حصل امبارح في العرض الخاص لفيلم ''كرم الكينج''.. أنا كنت في حالة صحية صعبة جدا ورغم كده كان لازم اجي أحضر العرض مع زمايلي.. وحاولت استجمع قوتي وأسجل مع مراسلي القنوات التلفزيونية الموجودة.. لكن للأسف حصل تدافع بينهم وبين بعض تحول لمشاجرة أمام عيني''.

وأضافت: ''ومن غير أي انهيار وبمنتهي الأدب اعتذرت عن التسجيل لأن لا حالتي ولا الموقف و لا قلة التنظيم كانوا يسمحوا بأي كلام.. حاولت أشوف الفيلم لقيت القاعة ممتلئة بالكامل، وفعلا مكنتش أقدر أكمل من غير ما أقعد، فقررت ارتاح في مكان لحد ما أبقى أحسن وأقدر أروح.. صحيت الصبح لقيت أكتر من موقع كاتبين اني تعاليت علي فيلمي و ما حضرتوش للآخر في حين ان السبب حالتي الصحية''.

وتابعت: ''أنا بس باطلب من أي حد قال عليا كده يتفرج على الفيديو ويحكم ضميره.. ويفكر يعني إيه تبقى طالع من المستشفى ومش قادر تقف لكن بتحاول تتعامل مع الناس باحترام.. وأتمنى من الصحف والمواقع يحاولوا بس يتفهموا الظروف الصعبة اللي ممكن الإنسان يمر بيها.. مش بنطلب منكم أي تلميع بالكذب، بس كمان حرام يبقى ثمن سمعة الإنسان شوية زيارات من ناس عايزه تقرا مشاكل وفضايح''.

يذكر أن الفيلم من بطولة الفنانين منذر ريحانة، ومحمود عبد المغني، وريهام حجاج، وعفاف رشاد، ومحمد على رزق، وهشام وجيه، والراقصة شمس، والمطرب محمد رشاد نجم أرب ايدول.