محمود عبد المغني يحذر من لعبة "البوكيمون".. تعرف على الأسباب

كتب - محمد صالح:

قام الفنان محمود عبد المغني بتحذير جمهوره من اللعبة الجديدة "بوكيمون جو" نظراً لخطورتها.

ويعتقد عبد المغني بأن اللعبة تحمل خطورة على الأمن القومي، وما هي إلا أداة للتجسس.

وقال الفنان الشاب عبر صفحته الشخصية بموقع "فيسبوك": "الكلام ده جايز يبقى صح خدوا بالكم ومنقول عن الغير.. بوكيمون اللعبة دي نزلت جديدة وعملت روشة وانقلاب في العالم كله بين يوم وليلة.. طبعا لما حاجه تظهر وتعمل الضجة دي كلها مع إنها لعبة عادية جدا يبقى في حاجه مش مظبوطة.. اللي مش عارفها هي عبارة عن لعبة بتدور على بوكيمون وعملات وحاجات كده على أرض الواقع بتمشي بالكاميرا بتاخدك بالخريطة لأماكن كتير تجبرك تمشي فيها.. طب فين الخطورة في كده".

وأضاف: "إنت ببساطة بقيت جاسوس مجاني ولا محتاج تدريب ولا محتاج شغل ده إنت بتصور كل الدنيا حواليك وبتنقلها على طبق من فضة.. طب مسألتش نفسك ليه اللعبة ممنوعة في بلاد معينة ولازم تعمل سيرفر أو بروكسي vpn عشان تعرف تحمل اللعبة ؟.. ناهيك عن الشرطة الأسترالية اللي نزلت تحذيرات كتير عن إنها ممكن تسبب حوادث كتير لأنك ماشي في الشارع سرحان ومركز في الموبايل إنك ممكن تخبط في أي حاجة وأى حد يخبطك طبعا إحنا في مصر موبايلك هايتسرق أكيد والحرامي هيقولك شكرا على حسن تعاونكم معنا وهو بيشده منك.. إنت مبتلعبهاش لوحدك هتلاقي بعد كده ملايين بتلعبها.. السيرفرات والخرايط دي كلها بتتربط ببعض بعد كده وبتكمل كل الصورة صوت وصورة لتصوير كل الأماكن الحيوية والخاصة".

وتعتمد اللعبة على توجيه المستخدم لأماكن بعينها في محيطه، ليتمكن من اصطياد البوكميون والتنقل بين مراحل اللعبة.