"محتاج سينما مفتوحة"..بهاء الدين محمد يقترب من انتهاء كتابة أول فيلم غنائي

كتب- هاني صابر:

أعلن الشاعر الغنائي بهاء الدين محمد، عن اقترابه من انتهاء كتابة أول فيلم غنائي بالسينما.

وكتب بهاء الدين، عبر حسابه على "فيسبوك": "الحمد لله.. تقريبًا في آخر خطوات كتابة أول فيلم غنائي من الألف إلى الياء وح تلاقوا فيه أفكار قريبة غريبة وعجيبة وجريئة".

وأضاف: "وأعتقد أن الفيلم ده محتاج لسينما مفتوحة مش قاعة عرض تقليدية .. قصة وسيناريو وحوار وأغاني بهاء الدين محمد".

وكان خلاف وقع مؤخرا بين بهاء الدين محمد والفنانة شيرين عبدالوهاب، هاجم الأول من خلالها الأخيرة بعد تصريحها عن ندمها على غناء أغنية "ما تجرحنيش" والتي تعاونا فيها سويا.

وكتب بهاء الدين، وقتها عبر حسابه على موقع "فيسبوك": "مش متعود أرد على أي حد.. ولكن لما حد يتجاوز حدوده لازم يقف مكانه ويعرف إنه مهما اتعود يغلط لازم ييجي عند بعض الأسماء ويحاسب ويخلي باله، وخاصة لما حد في كل كارثة يدافع عنها".

وتابع: "هتكلم باختصار جدا.. المشهد الأول: أول يوم دخلت شيرين عبدالوهاب مكتبي كانت مع الأستاذ نصر محروس اللي هو صاحب الفضل في تقديمها، وبعد دقائق من اللقاء لقينا شيرين بتبكي، وسألها (نصر) بتعيطي ليه؟ ردت علشان أنا قاعدة مع الأستاذ بهاء".

واستكمل: "المشهد الثاني: رشحتها تغني (كتير بنعشق) ولولا موافقة نصر احتراما للعشرة اللي بنا ماكانتش هتغنيها لأنها كانت موقوفة من النقابة".

وأوضح: "المشهد الثالث: لما فوجئت بمدير أعمالها الرجل اللي أنا بحبه وبحترمه لقيته بيكلمني نيابة عنها، ويقولي سمعني الجديد، وده طبعا خطأ لأن اللي بيغني مهما كان اسمه مش المفروض يغلط غلطة زي دي، لأن المشهد ده مش لايق على المشهد الأول".

وتابع: "المشهد الرابع والأخير: أغنية (ماتجرحنيش)، أنا لحد الآن مش عاجبني غُنا شيرين مع احترامي الكامل لصوتها، وأكيد لولا الأستاذ نصر ما كانش هيتم اللقاء، و(ماتجرحنيش) من أهم أعمالي ومن حقي أدافع عنها نتاج تهور اللي غنيتها".

واختتم: "وكمان لأول مرة ألاقى حد بيحارب نَفسه، وبيغلط في مبدعين اشتركوا في صناعته، وعشان أكتب الكلام ده يبقى شيرين غلطانة كالعادة، بس كان لازم أقولها ما تعمليش كده تاني، وأنتي بتكبري بس مش هتعدي حدود حجم بعض الأسماء ولا أعمالهم" .

يذكر أن شيرين عبدالوهاب، كانت قد أعلنت مؤخرا عبر "ستوري" حسابها على "إنستجرام"، أنها ندمت على غناء أغنية "ما تجرحنيش" للشاعر الغنائي بهاء الدين محمد.