"هقلل منه" فاروق فلوكس يجيب: هل يقبل التمثيل مع الفنان محمد رمضان؟ (خاص)

كتب- وائل توفيق:

أشاد الفنان فاروق فلوكس بموهبة الفنان محمد رمضان، رغم حديثه عن تجسيده شخصية "صبي عالمة" في فيلم "الرقاصة والسياسي".

وقال الفنان فاروق فلوكس في تصريحات خاصة لـ "مصراوي": "هو ممثل كويس، أنا معترف بيه ممثل كويس، بس له أدوار خاصة برضه ومحددة، ولو اتعرض عليا أشارك معاه في عمل فني، سواء فيلم أو مسلسل، هعتذر، ليه؟، مش عشان اتكلم عني، علشان هو لون مختلف، مقدرش أشتغل في أعماله دي، أنا أقل كثيرا منه عشان أقدر أشتغل في الأعمال دي، هو راجل كبير دلوقتي، بياخد فوق الـ 50 مليون، إزاي أنا اشتغل معاه، يعني أنا هقلل منه قوي إن أنا اشتغل معاه، الصراحة يعني ده محمد رمضان، حد قده؟ ده نمبر وان".

وأضاف: "هو ممثل كويس، لكن له حدود معينة، الأدوار اللي بيطلع فيها بالسيف والمطواه، وأنا نمبر وان وأنا كذه وبعدين تحول لمطرب، مش كده، بس خلاص بقى أنا مالي وماله، فيه ممثلين نقدر نتكلم عنهم غيره، نقول نور الشريف ومحمود عبد العزيز ويحيى الفخراني ونيللي كريم، فيه ممثلين كبار نتكلم عنهم".

يذكر أن الفنان محمد رمضان قال أثناء لقائه مع الإعلامية نجوى إبراهيم على شاشة قناة "النهار": "استشهد بالتاريخ، أول بطلة مطلقة للفنان فريد شوقي كان اسمه حميدو، أول بطولة ليه، كان عامل دور تاجر مخدرات بيغلط مع بنت جسدت دورها الأستاذة هدى سلطان فبتحمل منه، فبيقتلها هي واللي في بطنها، ده قريب قوي من عبده موتة، الفكرة نبص شوية للتاريخ بتاعنا".

وأضاف: "نجوم كبار ورموز من رموز الفن المصري، في البدايات كانوا مضطرين يعملوا أدوار في بدايتهم لو هجوع مش هعملها، دور صبي عالمة عملها نجم كبير في بداياته، عمله مضطر، فأنا راجل في بداية حياتي ببحث عن فرصة".