السقا يهدي تكريمه بـ"الجونة" لهؤلاء.. بينهم سمير غانم ودلال عبدالعزيز وساويرس

الجونة- منى الموجي:

استقبل حضور حفل افتتاح مهرجان الجونة السينمائي في دورته الخامسة، الفنان أحمد السقا فور صعوده على مسرح البلازا بتصفيق حاد، قبل أن يتسلم تكريمه ومنحه جائزة الإنجاز الإبداعي.

وقال السقا في كلمة ألقاها "عمري ما وقفت على مسرح، وقلت كلمة كبيرة، مكسوف وانا واقف وعرقان عرق هستيري، اسمحولي اشكر المهرجان على تشريفي بهذا التكريم".

وتابع "اسمحولس احكي حكاية يشهد عليها شريف منير اخويا الكبير وأستاذي، ومنى زكي كمان قاعدة، حدوتة شلة أصحاب أتربوا مع بعض من زمان اتربوا على حب السينما، حلموا يبقوا في الشاشة الكبيرة، حلم اقرب للخيال والمستحيل، كان اقصى طموح واحد فينا يعمل مشهد أو اتنين في مسلسل أو فيلم خصوصا ان السينما بعد 67 كان فيه ضيق خلق لصناعة السينما لغاية في اواخر التسعينيات، جه اسماعيلية رايح جاي وصعيدي في الجامعة الأمريكية، حصل طفرة كبيرة على مستوى التكنولوجيا ودور العرض والامكانيات والقدرات، السينما نجحت بالعرض، الموضوع اختلف تماما كنت من المحظوظين وسط كوكبة من النجوم نكون جزء من هذا النجاح والطفرة".

وأهدى السقا التكريم لعدة أشخاص، هم "اتنين بحبهم جدا حبوا بعض وعاشوا مع بعض وتألقوا مع بعض وسابوا الدنيا وان شاء الله يكونوا في الجنة مع بعض، النجم سمير غانم والنجمة دلال عبدالعزيز، الاهداء التاني راجل صعيدي خلف 3 رجالة علمهم ازاي يبنوا ويعمروا ويشغلوا آلاف والدليل اللي حصل امبارح، هو أنسي ساويرس اللي حصل امبارح معجزة: سميح ونجيب وناصيف".

وأضاف "الإهداء التالت لابويا الله يرحمه صلاح السقا، اللي علمني ان السيرة اطول من العمر، الإهداء الرابع مراتي وأم اولادي اللي وقفت جانبي طول عمري، الإهداء الخامس لو بيتقال عليا كلمتين حلوين واني شهم الفضل لسيدة قوية عملت بيت قوي نادية السروجي امي".

وكان إهدائه الأخير لكل زملائه وزميلاته وأبناء جيله، لانهم سبب رئيسي في تكريمه اليوم، حسب قوله.

تابع تغطية خاصة لمهرجان الجونة السينمائي (اضغط هنا)