سلمى صباحي لعمرو مصطفى: ''ربنا يشيل الغشاوة من على عينيك''

كتبت- منى الموجي:

أكدت المذيعة سلمى صباحي ابنة المرشح الرئاسي حمدين صباحي أن الفن بالنسبة لها أنقى وأرقى من أية توجهات واختلافات سياسية.

ووجهت سلمى رسالة إلى الملحن عمرو مصطفى نشرتها على حسابها الشخصي على موقع التواصل الاجتماعي ''فيسبوك'' قالت فيها ''مش عزيزي عمرو مصطفى .. معلش مقدرش اقول عزيزي لحد مش عزيز عليا فعلا! ليه بتجر شكلي!! دانا لسه بشكر في الغنوة!!''

وأبدت سلمى إعجابها بأغنية ''بشرة خير'' التي لحنها عمرو، كلمات الشاعر أيمن بهجت قمر، وغناها المطرب حسين الجسمي، وأضافت قائلة ''أنا عارفة أن الغنوة لحنك وعارفة أنك مؤيد للسيسي وعارفة انك مبتحبش حمدين وواثقه انك مابتحبوش ''عن جهل'' زي بالظبط مانت مش عارف بيشتغل ايه ''عن جهل'' وزي ما بتقول وبتردد كلام كتير جدا ''عن جهل'' برضو .. بس ده مالوش أي علاقه بأن الغنوة فعلا عجبتني، الفن بالنسبالي أنقى وأرقى من التوجهات والاختلافات والغنوة كلام قبل ما تكون لحن ومانكرش ان اللحن اللذيذ اللي شبه كل ألحانك المنحوته عجبني برضو.. انت معروف عنك من أيام الجامعه اصلا انك ''نحيت'' شاطر بصراحه .. دي حاجه معروفه في الوسط كله مش انا اللي اكتشفتها حتى اسأل اي حد!!''

وتابعت في رسالتها ''بص أنا عارفة ان قلبك طيب جدا لما شفتك صدفة في صدى البلد بعد ثورة يناير بكام شهر وجيت سلمت عليا واعتذرتلي عشان كنت كاتب عني على صفحتك دي برضو اني منفعش مذيعة لاني ''تخينه وفشله'' اد ايه ساعتها عرفت انك سطحي لدرجه مرعبة والمصيبة انك وقتها قلت كده بس عشان مبتحبش حمدين مش عشان شوفتني فعلا لا أصلح كمذيعة''.

وشددت سلمى على اهمية ألا تؤثر الانتخابات على العلاقات بين الناس، حتى لا يخسر الناس بعضهم، ونفت أن يكون المقصود بهذا عمرو مصطفى، موضحة أنهم ليس أصدقاء، مشيرة إلى انها تمتلك أصدقاء تحترمهم جدا ومنهم الشاعر أيمن بهجت قمر وهو مؤيد للسيسي لكن هذا الاختلاف لم يجعهلما يجرحان أو يهينان بعضهما، لافتة إلى إيمانها بأن كل شخص حر في اختياره.

وعادت لتوجه الحديث مرة أخرى لعمرو، مؤكدة أن كلمة تحيا مصر لا ''تغيظها''، مضيفة '' في كل الأحوال تحيا مصر طبعا بغض النظر عن مين الرئيس.. كده كده تحيا مصر بناسها مش برئيسها''.

وردا على اتهامه لها ببطء الفهم ردت سلمى ''بالنسبة بقى للبطء في الفهم أنا مش هرد على الجمله دي وبدعيلك ربنا يشيل الغشاوة من على عيونك وقلبك وضميرك عشان تعرف تشوف الحقيقه صح، وفي الاخر ربنا يولي الأصلح عشان أهم حاجه مصلحة بلدنا''.

وكان عمرو قد وجه لسلمى رسالة قال فيها ''عزيزتي سلمى صباحي انتي عارفة اني مبحبش بابا، ومش عارف هو بيشتغل إيه، وإغنية بشره خير لحني على فكرة، وطبعا لحني يعني تحيا مصر، فاهمة ولا الفهم بطيء زي بابا''.

لمتابعة أهم وأحدث الأخبار اشترك الآن في خدمة مصراوي للرسائل القصيرة.. للاشتراك ...اضغط هنا