رامي صبري: "الألبوم الجاي هيبقى فيه 5 أغاني دراما"
رامي صبري
كتب-محمد مجدي:
كشف المطرب رامي صبري عن تفاصيل ألبومه الجديد، كما أجاب على عدد من تساؤلات الجمهور عبر صفحته الشخصية بموقع "إنستجرم".
وعلق: "بيوصلني مسجات كتير أوي وبشوف كومنتات كتير أوي على إنكم عايزين الشغل الجديد يبقي زي الفترة الأولي اللي هي ألبوم حبيبي الأولاني وغمضت عيني، يعني عاوزين أغاني هادية كتير".
وأضاف: "أولا أنا بعمل أغاني هادية كتير جدا في كل ألبوم لأني بحبها، وثانيا عشان عارف إن الجمهور الأكبر بيحب الأغاني الرومانسية والدرامية".
وتابع: "لكن لما بتيجي تعمل ألبوم، بتلاقي إن لازم نعمل كل الأنواع عشان كمان يبقي فيه تنوع أكثر في أشكال الأغاني وعشان الأغاني السريعة تشتغل في حفلات وأفراح ومناسبات الجمهور يسمع الاغاني في كل الأماكن".
وأضاف: "أنا كمان كفنان مصري أقدر أنافس وأكبر اسمي بحتاج نوعية الأغاني السريعة عشان دايما الأغاني السريعة هيا اللي بتقدر بيها تخلي الناس تفرح أكتر مثلا زي الآخر أغنيه مبروك علينا، فمعلش إني مبعملش كل الألبوم أغاني هادية عشان الأسباب اللي قولتها في البوست".
وأشار: "الألبوم الجاي هيبقي فيه 5 أغاني دراما إن شالله، وأخيرا أتمني التوفيق والنجاح دائما لكل الناس".
فيديو قد يعجبك:
