حوار| سعد الصغير: "لو أعرف إن الأغنية دي هتعملي مشكلة مكنتش غنتها"

كتبت- منى الموجي:

بعفوية، وقبل سؤاله عن السبب الذي دفعه للخروج والتعليق على ما كتبه الدكتور مدحت العدل، وجاء فيه اسمه، واعتبره البعض تنمرًا، أكد الفنان سعد الصغير، أنه راجع نفسه ووجد أن كان عليه ألا يتحدث في الأمر، ولكنه شُحن وتأثر بالكلام الذي نقله له من حوله.

قال سعد في حواره مع "مصراوي"، إنه أخطأ عندما تحدث في الفيديو أن والده علمه أكثر من أي شخص يمتلك شهادة، ألا يتنمر على الآخرين، قائلًا "لو أبويا كان علمني فعلًا مكنش لازم أرد أصلا، بس ليا أولادي لعيبة كورة، ولقيت ناس بتقولي الحق مدحت العدل بيقول عليك إيه، لكن أنا مشفتش اللي اتكتب، ودي أول مرة أقول كلمة تويتر".

يعرف أن ما كتبه الكاتب مدحت العدل كان في إطار غضبه من بعض التعليقات التي خرجت بعد هزيمة نادي الزمالك في مباراته أمام "المقاولون العرب"، موضحًا "الدكتور لو متضايق كان المفروض يتكلم عن النادي المنافس، لكن المشكلة انه اتضايق على بني آدم عنده عيلة وأسرة ومن شبرا وسواق تاكسي، ممكن أقعد من الفن خالص بس محدش يهزقني، لاني لو قبلت أهلي مش هيقبلوا، لدرجة إني لما مثلا كنت في فيلم وماجد المصري ضربني افتكروا الحكاية بجد، وقالولي إزاي يضربك".

سعد الصغير معروف بانتمائه للنادي الأهلي، ورغم ذلك، أكد أن مع كل فوز لنادي الزمالك، يتصل ليبارك للاعب نادي الزمالك شيكابالا وغيره من لاعبي النادي، "وعندما أحيي أي حفل زفاف، وأعرف أن به أهلاوية وزملكاوية اختار الغناء للاثنين"، موضحًا "بروح فرح بغني للأهلاوية (لو كنت نسيت أنا مش هنسى ستة واحد في شهر خمسة)، وبغني للزملكاوية أغنية أنا اللي عملاهالهم وهما ميعرفوش (ارفع راسك فوق انت زملكاوي شجع يالا وقول قول يا زملكاوي الزمالك مدرسة الكورة)، أنا اللي مألفها، ليه بعمل كده لان مفيش تعصب وكلنا في النهاية واحد واخوات، عندي أغنية تالتة بغنيها للبورسعيدية: احنا البورسعيدية كل الشباب الأصل كل الرجولة اللي هي يعني النادي المصري".

وتابع "هو جه عليا، بس أنا بعتذرله، ومفيش أي حاجة وهو أخ، بتأسف له، وبتأسف لجمهور الزمالك أو أي حد لو كان شاف اني غلطت في أي جملة بالفيديو، بعتذرله ويعذروني"، عاتبًا على العدل انتقاده لأغنية "بحبك يا حمار": "اللي مضايقني إن الدكتور عارف إن ده في سياق فيلم ومغنتهاش بره مينفعش يتكلم في الحتة دي، ومش بقولها في أفراح، وفعلا عمري في حياتي ما غنيتها في فرح، لان ساعتها وهتكون في غير محلها".

سعد الصغير أشار إلى أن هناك نجوم كبير، لا يقارن نفسه بهم، غنوا للحمار مثل الفنانة شادية في سياق أحد أفلامها، وكذلك الفنان الراحل شكوكو: "لو أعرف أن الأغنية دي هتعملي مشكلة كده مكنتش غنتها خالص".

يتذكر سعد الصغير أنه تعاقد قبل سنوات مع الدكتور مدحت العدل، للمشاركة في مسلسل بطولة الفنانة زينة، لم يتم تنفيذه، لكنه كان قد تقاضى 50 ألف جنيه، وعن هذه القصة، يقول "عايز أقول له يا دكتور انت ليك عندي 50 ألف جنيه دي مفاجأة الناس متعرفهاش، مضيت عقد في الشركة عنده كنت هعمل مسلسل مع زينة والمسلسل وقف، (ضاحكًا) قوليله سعد مش هيرجعلك الخمسين ألف جنيه عشان مش معايا فلوس، لو هتعمل المسلسل هعمله".

يستعد سعد لطرح أغنية جديدة، بعد عودة الحياة لطبيعتها، ستكون مناسبة للأفراح، وفيها يقول "أنا العريس بيس بيس هتجوز من الصين جوازة مبتكلفش يدوب مصاريف الشحن من غير شقة وعفش، الصين عاملة أوكازيون وعلى حسابها المأذون".

وعن السينما "بقالي سنتين معمتلش فيلم كان كل سنة ليا عمل، مع عم أحمد السبكي، اللي اقترح إن أنا وأمينة نعمل فيلم لوحدنا، ومحمود الليثي وبوسي لوحدهم، وبعد تأجيل فيلمهم تم تأجيل الفيلم الخاص بي وبأمينة".

سعد شارك في رمضان المنقضي بمسلسل "ولاد إمبابة"، والذي رد على عدم تحقيقه لنجاح وشهرة، بأن العمل كان ينافس وسط أعمال تكلف إنتاجها 30 أو 40 مليون جنيه، بينما "ولاد إمبابة" لم يتكلف سوى 3 ملايين فقط، وكل مشاهده كانت داخلي، مضيفًا "وافقت على المسلسل لأن الورق كان حاجة مختلفة، وكان الاتفاق أن يكون في كل حلقة نجم كبير كضيف شرف، من بينهم أحمد السقا، لكن الحقيقة كانت مختلفة".

واختتم سعد الصغير حديثه مع "مصراوي"، متمنيًا أن تنتهي أزمة فيروس كورونا، وتعود الحياة لطبيعتها "يا رب أزمة كورونا تعدي على خير عشان الناس الغلابة تشتغل".

اقرأ أيضًا:

فيديو| سعد الصغير يهاجم مدحت العدل: "بتعايرني.. وانت ما تعرفش حاجة في الكورة"