زوج فاطمة عيد لـ"مصراوي": عملت إعلان "الكركمين" ببلاش من 5 سنوات

كتب- عبد الفتاح العجمي:

قال المؤلف شفيق الشايب، زوج الفنانة فاطمة عيد، إن الإعلان التي روجت من خلاله لمنتجات الصيدلي أحمد أبو النصر- معالج الأعشاب، تم تصويره منذ 5 سنوات.

أضاف زوج فاطمة عيد، في تصريح خاص لـ"مصراوي": "أول معرفتنا بأحمد أبو النصر كانت من 5 سنين، وهو بيعالج بالكركمين وحاجات تانية ملناش دعوة بيها، أنا كان عندي خشونة في الركبة وزيادة في الوزن، كلمته وقتها وقابلنا مقابلة طيبة وادانا الكركمين عشان نتعالج بيه، وفعلا هذا العلاج أفادني جدا وبعد ما كنت 104 كيلو بقيت 90 كيلو، وكمان الخشونة راحت تماما من رجلي".

تابع: "طبعا بعدها وثقنا في الراجل جدا، ولما حب يعمل إعلان الكركمين وافقنا عن ثقة وعملته هدية ببلاش، زي ما هو رفض ياخد ولا مليم في علاجي.. الحجة سجلت الإعلان ده من 5 سنين، واتذاع كتير جدا وقتها، ونحن لا علم لنا غير بالكركمين فقط، وهو مادة معروفة بالإضافة للتجربة بنفسي والله، الراجل معملش حاجة وحشة معانا وعشان كده عملنا الإعلان ولا نعرف عنه أكثر من ذلك".

وألقت أجهزة الأمن بوزارة الداخلية، القبض على الصيدلي أحمد أبو النصر، معالج الأعشاب، لإدارة مركز طبي بدون ترخيص بالجيزة والنصب والاحتيال على المواطنين بزعم علاج الأمراض المزمنة.