عمر طاهر يوضح الفرق بين محمد فؤاد ومنافسه الأشهر

كتب- عبد الفتاح العجمي:

أشاد الكاتب والسيناريست عمر طاهر، بتجربة النجم محمد فؤاد الموسيقية، مؤكدا أنه "كان مغامرا ومجددا وجريئا أكثر من منافسه الأشهر"، حسب وصفه.

وكتب طاهر، عبر صفحته الرسمية بموقع "فيسبوك": "بمناسبة وصول محمد فؤاد لسن ٦٠ أعتقد دي مناسبة لزملائنا نقاد المزيكا الشاطرين إنهم ينصفوا تجربة فؤاد وهي فعلا متعبية كلام وأفكار.. سيب آخر كام عمل وهاته من الأول هتلاقيه في منطقته كان مغامر ومجدد وجريء أكتر من منافسه الأشهر".

أضاف: "هو أول اللي اشتغلوا مع عصام عبدالله.. ياسر عبد الرحمن.. فهد.. مدحت الخولي.. أحمد منيب.. مودي الإمام.. هو اللي قدم وليد سعد.. محمد رحيم.. مصطفى عوض.. عزيز الشافعي.. وتامر عاشور.. الوحيد في جيله اللي كانت انطلاقة نجاحه من غير حميد الشاعري اشتغل معاه بعدين.. الوحيد في جيله اللي خاض تجربة جريئة ألبوم كامل مع أحمد الحجار".

تابع: "إزاي صوته وهو بيقول يا ليل بقى فاصل إذاعة الأغاني المصرية هو وماحدش غيره من جيله.. مواضيع أغانيه ماوقفتش في حتة واحدة.. فيلمين مع مخرج كبير زي خيري بشارة وفيلم غير خريطة السينما مع هنيدي.. طلع من الفلكلور غنا وقدم تترات بقت تفصيلة في أسماع الناس.. طبيعة نظرة الناس ليه وشكل الحتة اللي سكنوه فيها".

استكمل: "تجربة مليانة كلام وكتابة وحاجات يتقدر تعبه فيها وحاجات فكت منه طبعا زي أي حد.. بس إجمالا تجربة تستحق التقدير وتستحق أنها تتحط في مكانها بالضبط وإن حد ينتشلها من منطقة اللطافة والقلش وكام عمل مش قد كده مايلغوش اللي الراجل أنجزه بالفعل.. كل سنة وأنت طيب يا فؤش".

ومن جانب آخر، يتعاون عمر طاهر مع النجمين محمد هنيدي ومنى زكي، في فيلمه الجديد "الجواهرجي" من ﺇﺧﺮاﺝ إسلام خيري.