ريهام سعيد: "خدت عهد على نفسي ماعملش شو لحد"

كتب- ضياء مصطفى:

بدأت الإعلامية ريهام سعيد، حلقة جديدة من برنامجها "صبايا" ليلة أمس الاثنين، موجهة رسالة لجمهورها.

وقالت سعيد، في مقدمة برنامجها المذاع على قناة الحياة: "الحلقة دي من أهم الحلقات، كنت مستنية اليوم ده بقالي كتير، وللأسف عندي أحساسيس متلخبطة وحالة إحباط شوية، لأني حاسة إن الآية اتقلبت، يعني لو النهاردة مستضيفة خط الصعيد ولا ست عندها فضحية كنتوا هتستنوا الحلقة بفراغ الصبر وتتلموا حوالين التليفزيون، عاوزين تعرفوا وتضحكوا".

وأضافت: "وهو ده التسلية والشو، لكن ساعات الشو ده بيتوظف غلط، ما أنا لما بجيب مطرب شعبي بنضحك عليه ولا شخص ملوش شغلانة حتى لو بهاجهمه فأنا بعمله شهرة، وقت الناس بيضيع في حاجات ملهاش معنى، وأخدت عهد على نفسي إن ده ميبقاش في البرنامج".

وقالت: "لكن لو النهاردة طلعت طفل بيقول أنا عيان ديه حاجة مش مهمة ومش هتتفرجوا ولا هيكون تريند يوتويب، اضايقتوا أوي عشان طفل البلكونة كان هيموت، طب مانا بقالي كتير بقول في 100 طفل هيموتوا".

وواصلت: "أقسم بالله العظيم وأنا في أزمتي وأنا في السجن كان بيجي في بالي، يارب وقف حد في طريق الأطفال ديه وحد يعالجهم بعد ما شليت الفضل ده عننا".

واستطردت: "وخرجت لاقيتهم زي ما هما وحالتهم تدهورت وفي 20 طفلًا منهم ماتوا بعد ما كانوا 120، الحلقة دي تستحق تتشاف من كل واحد بيزعم أنه حد كويس وأنه طيب وبيحب البلد، ملزم تشوفها وتكلم اللي تعرفهم يشوفوها".

وتابعت: "دي مش حلقة ريهام سعيد مش حلقة صبايا، ربنا شاء أنه يوصل الناس ديه ليكم في الوقت ده عشان تساعدوهم، بقالهم كتير في الوضع ده".