فيديو يذاع لأول مرة.. سمير صبري عن فنانة نصحها بعدم تقديم تنازلات: لقيتها بترقص في حفلة

كتب- عبد الفتاح العجمي:

أذاعت الإعلامية إيمان أبو طالب، في برنامجها "بالخط العريض" على شاشة قناة "الحياة"، مقطع فيديو يعرض لأول للفنان الراحل سمير صبري، يتحدث فيه عن نصحه لفنانة عن عدم تقديم تنازلات من أجل التمثيل.

وقال صبري، خلال الفيديو: "أبو سمرة هيحكيلكم حكاية صاحبة الصورة دي، لكن مش هوريكم الصورة ولا هقولكم هي مين ولا أول حرف من اسمها إيه، زمان قبل ما تبقى نجمة كبيرة أوي اليومين دول، كنت قاعد مع بعض الأصدقاء، وفجأة جت واحدة لابسة تقريبا مايوه، وقالتلي أستاذ سمير عايزة أخد رأيك في حاجة مهمة جدا، قالتلي أنا غاوية فن وتمثيل وعاوزة أمثل إنما خوفوني من الفن وقالولي إني عشان أمثل لازم أقدم تنازلات".

أضاف: "قولتلها اوعي تقدمي تنازلات، العظماء في الفن معملوش تنازلات، أم كلثوم وفاتن حمامة وماجدة وشادية وسميرة أحمد وغيرهم، كل دول معملوش تنازلات ووصلوا.. قالتلي شكرا جدا وعمري ما هنسى نصيحتك ليّا، أصل في واحد هينتجلي مسلسل وعايزني أسافر بيروت معاه أصور هناك، قولتلها أنت قريتي السيناريو، قالتلي لأ، قولتلها خلاص اوعي تسافري، شكرتني تاني وانتهى اللقاء".

تابع: "بعدها بكام يوم، ليّا صديق دعاني لحفلة في بيته، دخلت الشقة كان في دوشة وكابلز مع بعض وكده، وفي ركن من أركان الشقة ترابيزة عالية ببص عليها لقيت واحدة حافية فوقها بترقص بلدي، لقيت البنت بترقص بلدي وضحك على الآخر، لما شوفت الوضع كده قولت أمشي قبل بوليس الآداب ما يوصل، لقيتها جايلي عند الأسانسير وبتفكرني بنصيحتي ليها وإنها عملت بيها ومقدمتش تنازلات، قولتلها لأ باين أوي".

يذكر أن برنامج "بالخط العريض" يذاع الجمعة ٨ مساء على قناة "الحياة" وتقدمه الإعلامية إيمان أبو طالب.