ميسرة: معنديش مشكلة أتجوز واحد متجوز.. وموافقة جوزي يتجوز عليّا لو قصرت معاه

كتب- عبد الفتاح العجمي:

قالت الفنانة ميسرة، إنها ليس لديها مشكلة في أن تتزوج رجل متزوج، أو أن يتزوج عليها زوجها من أخرى.

أوضحت ميسرة، في لقاء لها ببرنامج "كلام الناس" عبر قناة "mbc مصر": "معنديش مشكلة أتجوز واحد متجوز، لو حبيته واقتنعت بيه ممكن أتجوز، ولا عندي مشكلة إن الراجل يتجوز عليّا وهبقى كويسة معاها وهقدر أتحمل الظروف دي، وبالعكس مراته التانية هتبقى صاحبتي".

أضافت: "أنا أتجوز راجل متجوز لو هو فعلا في حاجة ناقصاه مع مراته، إحنا شئنا أم أبينا الرجالة عندهم التعدد، وإلا يبقى إحنا بنضحك على نفسنا، الراجل أول ما ربنا بيكرمه ويعمل فلوس بيتجوز، هو ربنا خالقه كده، والراجل بيبقى قادر في حاجات كتيرة جدا لغاية سن متقدم عن الست، فلو الست قصرت معاه في حاجات معينة، فلو هو محتاج واحدة تانية ومش عايز يغضب ربنا فيتجوز، وربنا أحل له ده".

تابعت: "لو الست عاملة له كل حاجة وهو طفس ليها حق أنها ترفض أو تقبل، بس أنا عارفة ستات كتير تقولك جوزي يصاحب بس ميتجوزش عليّا، طيب ما هو لو صاحب أنتي بتشيليه ذنب، أنا لو متجوزة ومقصرة مع جوزي في حاجات ومش قادرة أديهاله وهو بيدور عليها موافقة يتجوز عشانها، أنا لازم أبقى عادلة مع نفسي ومع غيري، لكن لو أنا مش مقصرة وعايز يتجوز مقدرش أقبلها وهنفصل عنه بهدوء".

ميسرة من مواليد 24 مارس 1967، لأم لبنانية وأب مصري، عاشت فترة كبيرة من حياتها في لندن، وكانت بدايتها مسيرتها الفنية من خلال الغناء إلى أن أحضرها إلى مصر الموسيقار حلمي بكر، تخرجت من كلية الفنون التطبيقية قسم ديكور، وكانت بدايتها في مجال التمثيل عام 2000 من خلال التليفزيون حيث شاركت بثلاث مسلسلات من أبرزها "جسر الخطر"، قبل أن تشارك في العام التالي بفيلم "حرامية في كي جي تو"، وتوالت بعدها أعمالها والتي من أبرزها "عمر وسلمى، سيدنا السيد، السفارة في العمارة" وغيرها.