حوار| بسمة داود: أنا طموحة ووحيدة بـ"جروب الدفعة".. واكتسبت أصدقاء من المسلسل

حوار- منى الموجي:

شاركت في الفترة الأخيرة بأكثر من مسلسل حرصت على تقديم أدوارا مختلفة خلالها، فأطلت على الجمهور في مسلسل "مشوار الونش"، ومسلسل "إيجار قديم" ومؤخرًا حلقات حكايات جروب الدفعة، هي الفنانة الشابة بسمة داود، التي كان لـ"مصراوي" الحوار التالي معها..

قالت بسمة عن حكايات "جروب الدفعة": "أحلى حاجة إن الحكايات تكون مبنية على أحداث مأخوذة من الواقع، إحنا عندنا الجروبات دي كتير، فيه جروب يضم الستات وآخر للرجال وثالث للشغل، دي قصة حقيقية بتحصل كل يوم بكل تفاصيلها، ومبسوطة اننا بنعمل حاجات الناس بتشوف فيها ارتباط بين حياتهم والعمل اللي بيتفرجوا عليه".

وعن كواليس المسلسل، أوضحت "الكواليس ظريفة جدا يمكن في الأول مكناش عارفين بعض كويس، بس بقينا أصحاب أوي ولغاية دلوقتي بعد خلصنا العمل وكل حاجة، لسه ما بينا جروب الدفعة وبنسأل على بعض ونطمن على بعض، وعلاقتنا بقت أحلى واكتسبت أصدقاء جداد".

وحكت بسمة عن شخصيتها "أسماء إنسانة طموحة، أيام الجامعة كان نفسها في حاجات كتير اوي تعملها، لكن لما الوقت بيعدي بتكون الحاجات متغيرة ومش بالسهولة اللي متخيلينها، هي مشهورة وعندها متابعين وبتتكلم عن الطاقة لكن وحيدة جدا، معندهاش حد لما رجع صحابها ليها اتشعلقت يبقى جنبها حد، وبنشوف في الأحداث إزاي شخصيتها بتتغير وإزاي بقت علاقات زمان غير دلوقتي وإن السنين بتغير كتير، أسماء شخصية حلوة اوي، والمسلسل كله مفيش فيه شخصية مش مكتوبة ومتنفذة بشكل هايل".

وبسؤالها هل تقديم دور يختلف عن شخصيتها في "إيجار قديم" كان من باب حرصها على التغيير أم أن الأمر صدفة، خاصة وأن دور ريهام حقق نجاحا كبيرا من خلال تفاعل الجمهور مع مشاهدها، وتحديدا مشهد ابتعادها عن "طارق" الشخصية التي لعبها الفنان محمد الشرنوبي، قالت "فيه ناس عملت فرح لما سبت طارق في إيجار قديم، بس عامة أنا أحب كل عمل أعمله أو أشتغل فيه أكون بقدم من خلاله حاجة مختلفة وأجرب شيء جديد عما قدمته من قبل، وشخصية ريهام كانت صعبة ومعقدة ومركبة جدا، ومع ذلك كان فيه ناس بتحبها، ومكنتش عارفة أنا هحبها ولا لأ لحد ما قدرنا نوصل لتفاصيل في الشخصية وبعد نقاشات، بدأت أذاكرها وأصنع تفاصيلها ومن كتر ما ركزت فيها كتير بقيت أنام أحلم بالمشاهد".

تتابع "رد فعل الناس على شخصية ريهام خضني، كان أول عمل أقدمه والناس متحبش الشخصية، لكن بعد كده انبسطت لإن ده معناه إني نجحت في تقديمها".

وعن تجربتها في مسلسل "مشوار الونش"، قالت "كنت متحمسة ليه جدا مكنش فيه مشاهد كتير بتجمعني بالفنان محمد رجب، مشاهدي كانت مع جروب البنات الصحاب، ومع جوزي ولعب دوره الفنان محمود عبدالمغني، الذي اتعلمت منه كتير وبحبه جدا وبحترمه أوي، كان فيه مشاهد حلوة أوي فيها مشاعر وحزن، أعتقد عملت دوري بشكل كويس وهناك مشاهد ببقى فرحانة وانا بتفرج عليها" .

بسمة درست في كلية الحقوق- شعبة اللغة الإنجليزية بجامعة المنصورة، وأكدت أنها لم تخطط أو يأتي على بالها أن تدرس التمثيل، خاصة وأن دراسته تتطلب أن تأتي إلى القاهرة وهو أمرا لم يكن مطروحا وقتها، مشيرة إلى أنها جاءت بعد ذلك للعمل بالقاهرة، وهنا قررت الحصول على ورش تمثيل، سعيا لتغيير شخصيتها الخجولة جدا، وكانت الورشة بابًا لتغيير ذلك، وهنا نما بداخلها حلم احتراف التمثيل.

الفرصة الحقيقية الأولى لـ بسمة كانت من خلال مسلسل "ملوك الجدعنة" بطولة الفنان مصطفى شعبان والفنان عمرو سعد، وذلك بعد فترة سعي كبيرة وتردد من جانبها، إذ كانت تتراجع مع كل فرصة حقيقية تأتيها.

وعن الخطوة المُقبلة، بعد انتهاء "جروب الدفعة"، قالت "الونش كان 45 حلقة وإيجار قديم بعده وجروب الدفعة، اشعر أنني أحتاج للراحة والهدوء بعض الوقت، حتى أستعيد نفسي، واستطيع تقديم ما هو قادم بصورة جيدة".

وخلال فترة الراحة، تعطي بسمة لنفسها بعض الوقت للنوم، قبل التفكير في العودة لروتين حياتها الطبيعي، تتابع "بحب أجرب حاجات جديدة، نفسي اشترك في ورشة نجارة أعمل حاجات بإيدي وأشوف ناس جديدة واكتشف حاجات جديدة فيا مش لازم تكمل معايا، بس فكرة التغيير مهمة".