رشحت شيرين الطحان لدور وجالي رد غريب.. كاتبة تكشف عن موقف صادم عن الفنانة الراحلة

كتب- مروان الطيب:
نعت الكاتبة شهيرة سلام وفاة الفنانة شيرين الطحان والتي وافتها المنية صباح اليوم الجمعة بعد صراع طويل مع مرض السرطان.
شهيرة نشر ت بوست عبر حسابها الرسمي "فيس بوك" وتذكرت موقف جمعها بالفنانة الراحلة وذلك بعدما شاهدتها لأول مرة بأحداث مسلسل "السبع وصايا" عام 2014، إلى جانب عملها مع في بداية مسيرتها الفنية.

وقالت شهيرة "شيرين الطحان كانت عامله دور صعيدية و حقيقي مثلته بشكل ملفت ورائع فقمت مرشحاها في مسلسل لي سنة ٢٠١٨ ، لقيت الرد غريب جدا .. انتي تعرفيها ؟ هي صاحبتك ؟ انتِ بترشحيها علشان هي صاحبتك، انا جالي ذهول لاني ماكنتش أعرف شيرين غير من الدور اللي شفتهولها وماكناش صحاب مع إنها من أول الناس اللي عملت معايا انترفيو في بدايات شغلي".

واستكملت "اتفاجإت إنها موهوبه فالتمثيل و ده مش بنلاقيه كتير .. و رشحتها و جالي الرد صادم و غريب زي كل تفاصيل المهنة الصادمة المريبة و اللي احيانا بتبقا مهددة للعمر و الصحة، الله يرحمها شيرين و يحسن إليها ،، أكيد أحلامها كانت كبيره …. شاطرة و حلوة و موهوبة من غير تكلف ولا تصنع ، بسيطة و ده شيء بقا نادر جدا".
وانهت تعليقها قائلة "ان البني آدم يكون شخص بسيط و سهل و طبيعي، طبيعي في كلامه و روحه و مظهره و أحكامه … دائما هذه الحياه هنفقد فيها ناس كانوا يستاهلوا يعيشوا اكتر و يحلموا و يحققوا اكتر و يستاهلوا مكانه اكبر .. بنبقا عارفينهم و بيبقوا معروفين و متحققين عند اللي فاهمينهم … افتكر رحيلها المفاجئ الصادم ده خلي كل الناس تلتفت و تقول معقول ؟ ازاي ؟ دي كانت حلوه اوي ، و كانت و كانت، مع السلامة يا شيرين، يا طيبة، يا حلوة يا بسيطة يا موهوبة يا محترمة".
ورحلت الفنانة سيرين الطحان في الساعات الأولى من صباح اليوم الجمعة بعد معاناة مع مرض السرطان.