بعد تعرضها لحادث.. رحمة أحمد تتدخل غرفة العمليات خلال أيام- صور

القاهرة- مصراوي:

تعيش الممثلة الشابة رحمة أحمد في حالة نفسية سيئة إثر الحادث الذي تعرضت له شهر يوليو الماضي، وتستعد للدخول لغرفة العمليات نهاية الأسبوع الجاري.

وكتبت رحمة عبر حسابها الشخصي على موقع "فيسبوك" رسالة لأصدقاءها ومتابعيها، قالت فيها "الحادثة كسرتني نفسيا وعضويا وكل لما احط أمل اني أخف من غير عملية وأحاول أصبر علي الالام، واروح للدكتور يقولي حالتك بتسوء اكتر.. انا مش عارفة هو ابتلاء ولا ذنب ربنا بيخلصه ولا بيكشفلي كل اللي حواليا ومين جدع عشان جدع ومين جدع علشان الناس تقول عليه جدع.. بس كل اللي بتمناه دلوقتي أن محدش يكون زعلان مني في أي حااااجة واللي زعلتهم من غير قصد انا اسفلكوا مفيش أضعف من كده موقف علشان اصالحكم بيه".

وطلبت رحمة من أصدقاءها الدعاء لها، مضيفة " لأول مرة اعرف معني الخوف وأول مرة أحس بضعف وإني لوحدي واللي واقفين جنبي من قلبهم انا اللي المفروض اكون ضهرهم سندهم، وسندهم المفروض ميتكسرش.. اسفة كمان اني مش برد علي تليفونات ولا مسجات و اختي كل لما تلاقي وقت تعرف تطمن الناس عليا بتعمل كده لانها تقريبا بتعملي كل حاجة وانا أوقات معينة اللي في اليوم اللي بكون فايقة فيها من الأدوية.. دعواتكم العملية آخر الاسبوع ده ويا اطلع سليمة يامطلعش".

جدير بالذكر أن رحمة شاركت في رمضان الماضي في أحد برامج المقالب ، وتدرس في معهد الفنون المسرحية ، وتعرضت في شهر يوليو لحادث سير أدى لإصابتها بكسر في العمود الفقري، وكُتب على صفحتها وقتها "يا جماااااااعة انا آسفة مش عارفة ارد اكيد على كل الناس اطمنها رحمة دلوقتي لسة في المستشفي لأن حالتها مش مستقرة و ممنوع عنها الزيارات لانها تعبت امبارح اكتر لما كان بيجلها ناس ومن كتر الألم الدكتور ادلها مسكنات قوية ويادوب بتتكلم بعنيها لانها اصلا مبتحركش رقبتها لأن حصلها كسر في الفقرتين الرابعة والخامسة فمجرد الكلام بياذيها غير أن لو ملتزمتش لمدة شهرين بثبات رقبتها الموضوع هيطور ويوصل للحبل الشوكي ولاقدر الله لو ده حصل هيحصلها شلل رباعي.. هي مش محتاجة اكتر من دعواتكم ليها".