نبيلة عبيد تكشف لـ"مصراوي" عن أمنيتها في عيد ميلادها

كتبت- منى الموجي:

تحتفل في مثل هذا اليوم من كل عام، 21 يناير، الفنانة نبيلة عبيد بعيد ميلادها، وحرص "مصراوي" على تهنئة الفنانة الكبيرة، ومعرفة كيف ستحتفل به ومع من.

قالت نبيلة، في تصريحات خاصة لـ"مصراوي": "كل الناس هنأتني بالتليفون، وقررت هذا العام الاحتفال بعيد ميلادي في جو عائلي، في البيت فقط مع الأولاد الصغيرين، ولاد إخواتي والصغيرين كلهم، والمقربين جدا جدا اللي بيحبوني وسيقومون بإطفاء الشمع معي الليلة".

وعن الأمنية التي تتمنى تحقيقها في عامها الجديد: "أتمنى على المستوى الشخصي، الصحة والستر، كانت الكلمة دي ماما تقولهالي، ربنا يسترك، أتمنى أعيش بصحة وستر ربنا ورضاه دايما، وأتمنى لكل المحيطين بي نفس الأمنية".

وأضافت: "أما لبلدي فأتمنى الخير والتقدم، وتبقى على طول منصورة، وتبقى هي نمرة واحدة في كل حاجة، عشان مصر هي مصر، ربنا يخليلنا الرئيس اللي شايل على كتافه حمل تقيل أوي"، لافتة إلى وجود طبقة لا تعرف ما حققه الرئيس من إنجازات، ولديهم قلق وتوتر، متابعة: "أحب أطمنهم، لأن المرحلة اللي جاية أحسن من اللي فاتت، الإنجازات اللي حصلت في الفترة اللي فاتت يمكن فيه طبقة معينة مش واعيين عليها، لكن إحنا واعيين عليها وعارفينها كويس، وإن شاء الله هيبقى لصالحهم وهتبقى كل حاجة افضل".

وأشارت إلى أن الغلاء موجود في جميع أنحاء العالم، مؤكدة أنها دائمًا ما تسافر وترى هذا الغلاء في كل مكان، مضيفة: "نتحمل بس إن شاء الله الأيام الجاية هتكون خير وكلها رخاء، بس لازم نبقى إيد واحدة ومنتكلمش على بعض، ونعرف إننا في حالة حرب لابد أن ننتصر عليها".