مخرج "طلق صناعي" يهاجم منظمي مهرجان جمعية الفيلم

كتب- علي المناوي:

هاجم خالد دياب، مخرج فيلم "طلق صناعي" القائمين على تنظيم مهرجان جمعية الفيلم، والذي أقيم حفل ختامه مساء أمس السبت.

وكتب دياب عبر حسابه الشخصي على موقع "فيسبوك": "جمعية الفيلم جمعية محترمة كلمني منها أحد المنظمين، قالي اخترنا فيلم (طلق صناعي) لحفل الختام والعرض بكره وكل صنّاع الفيلم معزومين، قولتله واضح إن التنظيم فيه مشكلة لأن مفيش حد بيعزم حد قبلها بيوم قالي ظروف خارجة عن إرادتنا وقالي ماجد الكدواني أكد حضوره هو وفيكتور كريدي مدير تصوير الفيلم ووزيرة الثقافة دكتورة إيناس عبدالدايم جاية.. قولتله أنا بحب دكتورة إيناس عبدالدايم ولو هاتتفرج هي على الفيلم وهاسمع رأيها هاجي.. أكدلي انها هاتتفرج على الفيلم وقالي في تكريم لبعض السينمائيين وبعدين هانعرض الفيلم، قولتله بلاش تكررو الغلطة.. بعد الاحتفالية والتكريم الناس هاتمشي قالي بكل ثقة يا فندم احنا بقالنا ٤٣ سنة بنعمل الحفلة وعارفين بنعمل ايه كويس".

وأضاف دياب: "طخيت مشوار ساعتين لمكان الحفلة لقيت لا ماجد الكدواني جه ولا فيكتور كريدي جه والوزيرة إيناس عبدالدايم سلمت الجوائز ومشيت وكل كلمة قالها المنظم لم تتحقق".

واختتم كلامه المنشور على حسابه، مطالبًا بتغيير المنظمين القائمين على الحفل قائلًا: "كل التقدير للوزيرة اللي متأكد تمامًا إنها قايلة للمنظمين إنها هاتسلم الجوائز وهتمشي وكل التقدير لجمعية الفيلم لكن لازم تجيبو منظمين أفضل ومهنيين عن كده".