إيناس عزالدين تنفصل عن زوجها: "النصيب وقف لحد كده"

كتب- محمد مجدي:

كشفت المطربة إيناس عز الدين عن انفصالها عن زوجها أحمد قمر، عبر صفحتها الشخصية بموقع التواصل الاجتماعي "فيسبوك"، متمنية له الخير في حياته القادمة.

وكتبت إيناس: "بعلن انفصالي عن زوجي أحمد قمر بكل حب وود واحترام وتقدير.. ممكن نكون اختلفنا كأزواج إننا نكمل مع بعض أو النصيب وقف لحد كده بس هيفضل صديق عمري كله، بتمنالك كل خير وكل سعادة ونجاح يا أحمد يا أنضف إنسان عرفته في حياتي، كله قسمة ونصيب.. معلومة دي مش كدبة إبريل ولا ده خبر هزار".

وأضافت: "هو ليه الناس مش متقبلة فكرة إننا انفصلنا واحنا بنحترم بعض وبنحب بعض وشايلين لبعض الخير والتقدير وإننا اختلفنا كزوجين؟ وأكيد القرار ده ما أخدناهوش وليد اللحظة وقبل ما نعلنه اتناقشنا كتير وقررنا ننفصل بالمعروف واحنا شايلين وفاكرين لبعض كل حاجة حلوة.. مش لازم نذم في بعض ونغلط في بعض وكل واحد فينا يقول التاني كان مطلع عينه علشان الناس تتقبل فكرة انفصالنا".

وتابعت: "إحنا اختلفنا وصعب نكمل كزوجين بس مستحيل نبطل نفضل في حياة بعض كأصدقاء، لأننا طول عمرنا كنا أصدقاء حتى واحنا متجوزين، والعشرة مش بتهون بالساهل ومش معنى إننا اختلفنا وانفصلنا كأزواج إننا نكره بعض ونغلط في بعض وما نشوفش بعض ونعادي بعض.. إحنا هنفضل أهل غصب عن أي شيء وبنكن لبعض كل حب واحترام وتقدير".