الفنان محمد عز يروي قصة من حياة والده "سواق الميكروباص"

كتب - بهاء حجازي:

نشر الفنان محمد عز، على حسابه الرسمي بموقع "إنستجرام" صورة لأحد الشوارع في الجيزة.

وعلق عز على الصورة، قائلا: "هحكيلكم حكايه من حكايات الراجل الطيب والست الأصيلة دى الجنينه اللي قدام باب جامعة القاهرة الرئيسي واللي بين جنينه الحيوانات وجنينه الأورمان، زمان كان في راجل طيب موظف في المرور عنده أسرة ست وولدين وبنتين، كالعادة مرتبه عمره ما يكفي يعيش الأسره دى فكان يشتغل بعد الظهر سواق علي ميكروباص كان خط سيره من الجيزه للمنيب إلا في يوم الإجازه كان بيعمل دورين منيب بولاق".

وأضاف عز: "ليه كان بيعمل الدورين تحديدا؟، كانت الست الأصيلة تحب تشم هوا وتفسح الأولاد فكانت تعمل سندوتشات البطاطس المحمره و لو الظروف تسمح كانت بتعملهم مكرونه وفراخ وكان يعدى آخر النهار وهو في طريق لبولاق يركب معاه الميكروباص وينزلهم الجنينة دى يلعبوا ويبسطوا لحد الليل وكان لو عدى عليهم يهيصوا ويشاروله وهما فرحانين وراضيين وهو مروح في آخر دور يعدى ياخدهم ويجيب لهم شويه فاكهه وفول سودانى بقشره يتسلوا الولاد ويتبسطوا، كانوا الولاد فرحانين والست الأصيلة راضية وسعيدة مكانش في مولات ولا موبايلات ولا خروجات بآلاف بس كان في رضا وبساطة وفرحة وضحكة من القلب".

وأنهي عز حكايته "فرحت وأنا معدى النهارده لقيت الناس مبسوطة وفرحانة وكنت فاكر إن مبقاش في الحاجات دى بس الحمد لله لقيتها، الله يرحمك يا أبويا ويشيفيكى ويخليكي ليا يا أصيله يا أمي".

يذكر أن محمد عز شارك في رمضان الماضي في مسلسل "نسر الصعيد" من بطولة محمد رمضان ووفاء عامر وإخراج ياسر سامي.