خالد عليش معلقًا على غيابه عن "نجوم أف إم" في 2019:"مش عايز بصات شفقة عشان فيا اللي مكفيني"

كتب - بهاء حجازي:

نشر الفنان خالد عليش عبر حسابه الشخصي بموقع "إنستجرام" صورة أثناء مغادرته مقر راديو "نجوم أف إم" بعد سنوات من العمل فيه.

وعلق عليش على الصورة قائلاً:" لكل إللي بيسال وإللى مهتم وإللى مش مهتم، أنا ليه مش موجود في "نجوم أف إم" السنة دي، للأسف و ببالغ الحزن و الأسي مش هكون ضمن فريق "نجوم أف إم" السنة دي يعني مفيش معاك في السكة ولا موقف ولا هلي في ٢٠١٩، أسباب كتير هي السبب في القرار ده منها الميعاد الصعب جدًا وخصوصًا إني بشتغل حاجات تانية منها إني بمثل وغيره".

وأضاف عليش :"بس اللي يعرفني كويس في الشغل يعرف إني بحب التجديد دائمًا، ومحبش أقف عند مرحلة معينة من النجاح و خلاص، نجاحي في نجوم أف إم مكانش معتمد عليا أنا بس ، بالعكس أنا كنت جزء صغير جدًا من منظومة اتشرفت إني اشتغلت معاهم من أصغر شخص لأكبر شخص .. و لآخر لحظة علاقتنا زي الفل يعني مش ماشي بمشكلة ولا حصلت خناقة عشان الإشاعات المغرضة .. وكان من أهم أحلامي اللي عافرت كتير عشان أوصله إني اشتغل مذيع في نجوم إف إم".

وختم خالد عليش بيانه:"أنا سايبلكم خالد جواد مكاني عشان الوحيد اللي لقيته اسمه خالد، ربنا معاه إن شاء الله ونجوم إف إم كلها في ضهره، أنا أسف لكل اللي اتعودو يروحو على البرنامج و لكل اللي مزاجه بيظبط مع الهلي.. بس هي سنة الحياة التغيير، مش عايز حد يزعل، و عايزيكم تقفوا معايا في خطواتي اللي جاية و بلاش عبارات ليه يامعلم تعمل كده ده أنت كنت مكسر الدنيا، و لا بصات الشفقة عشان أنا فيا اللي مكفيني، انتظرو تفاصيل أكتر عن المشروع الإذاعي القادم في الأيام الجاية"

يُذكر أن خالد عليش شارك في رمضان الماضي في عدد من الأعمال التلفزيونية منها مسلسل"عوالم خفية "، مع الزعيم عادل إمام.