بعد تعاونهما معًا.. لماذا رفض تامر حسني العمل مع شقيقه لسنوات؟

كتبت- ياسمين الشرقاوي:

بعد سنوات من رفضه التعاون معه، أعلن الفنان تامر حسني عن تعاقده مع شقيقه المنتج حسام حسني، لإنتاج فيلمه الجديد كأول تعاون بينهما.

وشارك "حسني"، جمهوره ومتابعيه عبر حسابها بموقع "إنستجرام"، صورة له برفقة شقيقه، وروى قصة تعاونهما قائلًا: "الصورة دي والفرحة اللي في ضحكة حسام أخويا لازم أكلمكوا عنها.. دا حسام أخويا الكبير كان نفسه يدخل عالم الإنتاج الفني من ٥ سنين وينتجلي وأنا الحقيقة كنت دايماً برفض وكان بيزعل مني، بس كنت دايماً بشرحله إنه لازم يدرس السوق الأول وميعتمدش عليا ويفهم ويذاكر كتير أوي مش عشان ينتج لا عشان يكون منتج شاطر".

تابع: "فعلًا عمل كدا واستوعب كلامي وبدأ يتفرج ويتابع كل اللي بيحصل من أول فيلم أهواك وتصبح على خير لحد ما شارك بجزء بسيط في إنتاج فيلم (البدلة) وأشرف على إنتاج ألبومي (عيش بشوقك) وإنتوا أكيد شايفين العملين طلعوا إزاي للناس وإزاي نجحوا والحمد لله، كل عمل فيهم في السنة دي حقق نجاح كبير جداً".

أضاف: "أنا في الصورة دي كنت قاعد بمضي عقد أول فيلم إنتاجه وكان بيقولي (طلعت عيني عشان القعدة دي) وأنا كنت بقوله إوعى تزعل مني، أنا كنت بعلمك تكون قد المسؤولية لوحدك، ودلوقتي بأمانة أنت قدها، وأنا اللي فخور إنك بتنتج لي؛ عشان شايفك بجد شخص بقى شاطر جدًا ومجتهد وبتفكر صح وشركتك دلوقتي فيها أقوى الأفراد من كل الجوانب، وأنا فخور بيهم كلهم فعلاً، ألف مبروك يا حبيبي يا أخويا الكبير ياللي ياما علمتني حاجات جميلة وأنا صغير، النهاردة بردهالك من قلبي، وبدعيلك ربنا يكرمك ويكرمنا جميعاً ويكرم كل مجتهد وتكمل مشوارك وتنتج ليا ولغيري".

وينتظر تامر حسني عرض فيلمه الجديد "الفلوس"، خلال الفترة المقبلة، والفيلم من ‏بطولة زينة، خالد الصاوي، عائشة بن أحمد، ‏نانسى صلاح، محمد سلام، تأليف محمد عبدالمعطي، إخراج سعيد ‏الماروق. ‏ ‏