محسن محيي الدين يكشف لـ"مصراوي" سبب قبوله المشاركة في مسلسل "ليه لأ"

كتب- هاني صابر :

أعرب الفنان محسن محيي الدين، عن سعادته بردود الفعل الإيجابية على مسلسل "ليه لأ" بشكل عام، مؤكدا أن الاختلاف على المسلسل في وجهات النظر بين الناس "عامل شغل حلو للعمل، وردود فعل عالية".

وكشف محسن، في تصريحات خاصة لـ"مصراوي"، عن سبب قبوله المشاركة في هذه التجربة الدرامية، قائلا: "المسلسل يناقش قضية مهمة، وهىي صراع الأجيال، جيل بيحاول يلغي الجيل اللي بعده، والجيل اللي بعده بيحاول يثبت وجوده، ويحمل أفكار بتخلي كل واحد يدافع عن وجوده، فالكبار مش عايزين يتلغوا والصغار مش عايزين يتلغوا، وفيه بعض المشاكل اللي بتحصل بين الجيلين".

وأضاف: "أحيانا الجيل الجديد مبيتحملش مسئولية وسايب كل حاجة على سيطرة الأب والأم.. فاحنا مش بنديلهم فرصة في الوجود، وعشان يقدروا، لازم يتحملوا مسئولية، وده اللي بتبحث عنه بطلة العمل مع أمها اللي مدخلتهاش مطبخ، ومخلتهاش تاخد قرار في حياتها، وتخوض تجارب، وقفلت عليها جامد، وبقت هي المسيطرة ووجهات نظرها تخلي ابنتها دايما عندها إحباط ".

مسلسل" ليه لأ" يتناول عدة قضايا أبرزها الاختلاف بين الأجيال فى الفكر والأخلاق والتكنولوجيا، بالإضافة إلى التطرق للقضايا المجتمعية التي يمر بها الأبناء ويعترض عليها الآباء.

ويعرض مسلسل" ليه لأ"، عبر منصة شاهد vip، والعمل بطولة: أمينة خليل، هاني عادل، شيرين رضا، عمر السعيد، صدقي صخر، مريم الخشت، هالة صدقي، محسن محيي الدين، عمر الشناوي.