عمرو ياسين داعمًا السولية بعد الإساءة لابنته: "لازم الدولة تتحرك.. لازم ننضف"

كتبت- ياسمين الشرقاوي:

حرص الفنان والسيناريست عمرو محمود ياسين، على دعم عمرو السولية، لاعب الأهلي، بعد التحرش والتنمر على ابنته.

وكتب "ياسين"، عبر حسابه بـ"فيسبوك": "تخيلوا بنت عمرو السولية طالعه معاه في صور. فالردود اللي بتتقال له من نوعية بنتك مكنة صيني، بنتك وتكه... إلخ، ملحوظه ابنة عمرو السوليه عمرها ٣ سنوات ونصف!".

وأضاف: إيه يا جماعة المجتمع المريض اللي إحنا فيه ده؟ إيه المصيبه اللي إحنا فيها دي؟! لازم الدولة تتحرك وتجيب الناس دي والله .. لازم ننضف".

وتعرضت ابنة لاعب الأهلي عمرو السولية، للتنمر عبر السوشيال ميديا، عقب نشر والدها صورة تجمعهما، وهو ما أثار غضب "السولية"، الذي قرر الإبلاغ عن المتحرشين، وكتب عبر حساباته بمواقع التواصل الاجتماعي: "ليلى بنتي عندها ٣ سنين و نص (لسه قالعة البامبرز من كام شهر) الكلام ده بيتقال على طفلة!! أيه اللي يخلى (بني آدم) خنزير ممكن يبص على لبس طفلة ويركز غير أنه فعلاً خنزير؟! ايه المرض ده".

وأضاف السولية: "دول اللي لما بيكبروا بيكونوا مغتصبين ومتحرشين واللي بنخاف على بناتنا وأهلنا ينزلوا الشارع عشان ميتعرضوش لأذاهم، أتمنى الشيوخ اللي بيبرروا للتحرش ولبس البنت يكونوا مبسوطين دلوقتى وهما شايفين اللي بيحصل".

وتابع: "قررت أتقدم ببلاغات لأصحاب الكومنتات دى عشان اللي زى دول مينفعش يكبروا وسطنا قررت أحمى بناتي اللي لسه مشافوش الدنيا وللأسف خايف عليهم يشوفوا كمية القرف والاشمئزاز ده".