ممثل شاب يكشف عن إصابته بفيروس كورونا وهذه ما طلبه من نقيب الممثلين

كتبت- منى الموجي:

كشف الفنان محمد صلاح آدم عن إصابته بفيروس كورونا المستجد، وتواجده في المستشفى لتلقي العلاج، وذلك عبر حسابه على موقع "فيسبوك".

وجاء في رسالته لأصدقائه "بكتبلكم وأنا على سريري في مستشفى صدر العباسية، وبعد عمل أشعة مقطعية على الصدر اللي أكدت اني أصبت بالوباء اللعين، وقالولي اتأخرت ليه، يمكن تكون آخر كلمات ليا في الدنيا دي.. اترددت كتير بس لقيت نفسي مش قادر وبكتب.. لاني حسيت احساس غريب حسيت اني مش خايف من الموت.. انا خايف اني اموت قبل ما أشوف النجاح.. استغربت وقولت لنفسي انت مش خايف من الموت؟ قولت والله لا.. انا خايف اموت قبل ما أشوف نجاحي".

وتابع صلاح "بلدنا بقى الحلم فيها.. انك بس تشتغل.. انت بس بتحاول طول الوقت انك تشتغل.. وتخبط على البيبان وكل البيبان بتتقفل في وشك.. شباب في اول عمرهم وشباب بقوا رجال ورجال أصبحوا كهول وبنات وسيدات موهوبين خريجين المعاهد والكليات الفنية وماوقفوش أمام كاميرا.. واللي هاجر واللي اكتأب واللي انتحر.. اجمل ما في الوجود الحلم والطموح واقبح ما في الوجود عدم تحقيق الحلم أو الطموح ده".

وطالب أصحاب الاختيار في شركات الإنتاج من المخرجين ومساعديهم أو مديري الإنتاج وغيرهم، الالتفات للموهوبين في مصر، مضيفا "اللي ضيعوا عمرهم في حب الفن ودراسته سنين كتير، لكن معندهمش واسطة ولا صاحب ولا قريب مخرج ولا منتج ولا منتج فني ولا ابن نجم برضه كتير قوي.. انا كل اللي بتمناه العدل.. أن الموهوبين دول ياخدوا فرصة من الفرص الكتير قوي دي.. معرفش ازاي ممكن يتحط النظام.. اللي بيه كل الموهوبين الدارسين أعضاء نقابة المهن التمثيلية ياخدوا فرصة.. واللي يثبت نفسه يكمل واللي ما يثبتش نفسه الجمهور هايقول عليه لأ.. بس بعد ما يكون اخد الفرصة.. فكرت ولقيت ان انسب حل.. وانا يمكن ماحضرش تنفيذه أو حتى الموافقة عليه.. هو عمل بروتوكول ملزم بين الدكتور أشرف زكي بصفته نقيب فنانين مصر ورئيس أكاديمية الفنون المصرية -على فكرة أكاديمية الفنون في أمريكا هي اللي بتمنح جائزة الاوسكار-، وبين الأستاذ تامر مرسي بصفته رئيس مجلس إدارة الشركة المتحدة للخدمات الإعلامية اكبر وأهم شركة إنتاج في الشرق الأوسط، وطبعا بعد كده ممكن كل شركات الانتاج والمخرجين يمضوا ويفعلوا نفس البروتوكول واللي لازم الجميع يتفق على بنوده وصياغته، وانا عندي ثقة كبيرة في كل القائمين على هذه الصناعة الكبيرة والعظيمة وفي قائدنا الحكيم المخلص السيد الرئيس عبدالفتاح السيسي، اللي اكيد هايرحب بالعدل أو شكل من أشكال تحقيق العدالة . ويارب لو اتحقق الحلم ده.. وكنت يعني لا قدر الله مت ابقى مت وانا مستريح وسيبت لأولادي مايفخروا بيه".

محمد صلاح آدم، خريج أكاديمية الفنون المعهد العالي للفنون المسرحية، قسم التمثيل والإخراج، شارك في عدة أعمال مع نجوم كبار بينهم: الفنان نور الشريف في مسلسل "الرحايا"، الفنان حسن يوسف في مسلسل "إمام الدعاة"، الفنان يحيى الفخراني في مسلسل "عباس الأبيض في اليوم الأسود".