داليا شوقي تنعي محمود اللوزي: مش قادرة أبطل عياط
داليا شوقي
كتب- عبد الفتاح العجمي:
نعت الفنانة داليا شوقي، الفنان محمود اللوزي، والذي رحل عن عالمنا عن عمر يناهز 63 عاما.
ونشرت شوقي، صورة لها مع اللوزي عبر حسابها بموقع "إنستجرام"، وعلّقت: "حبيبي يا لوزي.. مش قادرة أبطل عياط من ساعة ما قريت الخبر.. أنت أول واحد آمن بيّا واداني فرصة على المسرح.. أنت أول واحد عيطت معاه في مونولوجي.. أنت شوفتني قبل ما أشوف نفسي فـ(سوسو) في (سكة السلامة) و(زيزا) في (الحياة تحطمت) و(Sylvia) في (The Game of Love and Chance).. تلاتة بموت فيهم أكتر من بعض".
أضافت: "أنت أول واحد فضفضت معاه لما اتخضيت من العالم اللي بره مسرحنا.. ولومتك يا حبيب قلبي، لومتك إنك حبتني أوي واحتوتني أوي وعلمتني صح أوي أوي، والعالم اللي بره قاسي عليّا أوي أوي أوي.. لأ بجد مش قادرة استوعب.. ماتمشيش.. هتوحشني فوق الوصف.. أنت اصلاً واحشني".
تابعت: "هتوحشني ثقافتك اللي بلا نهاية ومزيكتك الفظيعة وضحكتك اللي أنا سامعاها في ودني دلوقتي.. وهوسك بالأهلي وقد إيه بيفرحوك من قلبك.. وكلامك عن عيلتك الجميلة اللي كنت بتتحول وأنت بتتكلم عليهم من كتر الحنية اللي في قلبك تجاهم.. سوسن الجميلة وولادك حبايبك وأحفادك اللي غيروالك حياتك وكلابك اللي كنت بتموت في دلعهم".
استكملت: "عارفة قد إيه كنت بتحب الشتا.. عيطت أكتر لما استوعبت إن الشتا جاي وأنت مش هتبقى هنا معانا.. يعني إيه لوزي مشي؟ لأ يا حبيبي.. أنت عمرك ما هتمشي.. شكرا على كل حاجة.. أنت مش فاهم أنت بالنسبالي إيه.. أنت المسرح يا لوزي.. أنت المسرح".
اختتمت: "كنت دايماً أقولك ربنا يديك طولت العمر يا لوزا.. يا بخت جيلنا وكل الأجيال بيك.. بحبك أوي أوي يا لوزي.. وبشكرك.. بشكرك من كل قلبي.. متتأخرش علينا أوي".
وتوفي الفنان والمخرج المسرحي محمود اللوزي، والد الفنانة يسرا اللوزي، عن عمر يناهز 63 عاما.
محمود اللوزي هو مخرج مسرحي، وأستاذ إخراج في الجامعة الأمريكية بالقاهرة، وشارك كممثل في أفلام منها: "إذاعة حب" 2011، "ميكروفون" 2011، "عشم" 2012، "الكنز: الحقيقة والخيال" 2017، ومسلسلات منها: "خاص جدا" 2009، "الجماعة ج1" 2010، "الخروج" 2016، و"الحالة ج" 2017، كما شارك في أعمال "ديزني العربية" منذ تسعينيات القرن الماضي، ومن أشهرها في فيلم "البحث عن نيمو Finding Nemo" عام 2003، حيث قام بتجسيد صوت "السمكة مرهف".
View this post on Instagram
فيديو قد يعجبك:
