"تعرضت للكيد وأنا ومنة شلبي مكناش بنطيق بعض".. تصريحات هند صبري لـ"معكم"

كتب - هاني صابر:

حلت الفنانة هند صبري ضيفة ببرنامج "معكم" الذي تقدمه الإعلامية منى الشاذلي المعروض على فضائية CBC ، وتحدثت خلال الحلقة عن صعوبات بدايتها مع التمثيل وصداقتها مع منة شلبي وأحمد السقا وتكريماتها، غيرها.

نستعرض لكم 22 تصريحا لـ هند صبري بالحلقة في التقرير التالي:

- مكنتش مصدقة إني ممكن اتكرم من الرئيس عبدالفتاح السيسي على مشهد في فيلم "الممر".

- الحرب مش بس رجالة على الجبهة لكن أمهات بتربي الأطفال لوحدها .

- أول فيلم عملته كان عندي 13 سنة وكان "صمت القصور" ومهرجان قرطاج كلموني علشان ياخدوا موافقتي على وضع صورتي على البوستر وطبعًا وافقت لأن الدورة دي تكريم لمخرجة الفيلم اللي توفيت بسبب الكورونا.

- سعيدة جدًا أن أول رئيس وزراء في العالم العربي في تونس سيدة وده تكريم للمرأة وسعيدة بوجود عدد من الوزيرات المصريات.

- نفسي ثقافة إعادة التدوير تنتشر وأنا عندي سلة بحط فيها الكارتون والمعدن والبلاستيك والمندوب بيجي كل أسبوع ياخدها.

- أنا بنت وحيدة ومامتي هي ملهمتي وهي كانت مدرسة وعايشة معايا في مصر من 5 سنين.

- لما قدمت منة شلبي أثناء تكريمها وحصولها على جائزة فاتن حمامة في مهرجان القاهرة، الإدارة طلبت مني وأنا قلتلهم يا ريت.

- أنا ومنة شلبي كان فيه مشاكل بينا زمان ومكناش بنطيق بعض، بسبب الناس اللي بتوقع بينا، لأن لما بدأنا طلعنا سوا في نفس الوقت زي منى زكي وحنان ترك زمان، وكنا بنسلم على بعض عادي بس بحرص شديد.

- لما طلبني محمد خان أنا ومنة شلبي.. كان عاوزنا في فيلم سوا، رحنا له البيت كتعارف وسابنا قاعدين سوا في الصالون وقال رايح أعمل قهوة ومن هنا بدأنا نتكلم سوا وصفينا الموضوع ومن وقتها بقينا أصحاب أكتر .. وبقالنا تقريبا 20 سنة.

- أنا مش وحشة في خصامي، ومعنديش الكيد ولا منة شلبي، وكنا وقتها عيال أوي ومحصلش خصام ولكن زي ما قلت كان فيه حرص وممكن يكون فيه قلق بنا وفيه منافسة على أفلام وأدوار، ولما كبرنا فهمنا إن مفيش حد لو نجح هيخلي التاني يخسر حاجة.

- الوسط الفني في صداقات وحب وفي برضه ناس مش كويسة.

- أنا اتعرضت للكيد زمان في بداية حياتي وكانوا بيقولوا عليا "المغتربة".

- أنا شريكة في شركة لإنتاج مواد ديجيتال، ودايما بحب مخي يكون شغال.

- أحيانا بكتب أفكار سواء لبرامج أو أفلام أو مسلسلات.

- قررت من فترة إني لازم الرياضة تبقى جزء من حياتي ولازم أعملها كل يوم زي ما بغسل سناني، وإنه واجب لازم أعمله.

- بعد ما خلفت بنتين شكلي تغير تماما عن قبل الإنجاب، وشفت أمهات عندهم 4 أو 5 أولاد وفي منتهى الرشاقة.

- أحمد السقا زي أخويا بالظبط، ووقت تكريمه بمهرجان الجونة الكلام اللي قلته أنا اللي كنت كتباه وقلته من جوه قلبي، وكنت مبسوطة وفرحانة جدا بتكريمه.

- أعرف أحمد السقا بقالي 14 سنة وعملنا سوا 3 أفلام، هي الجزيرة بجزئيه الأول والثاني وفيلم إبراهيم الأبيض، وكل فيلم فيهم أرشيف أفلام، وعلاقة الأفلام دي بالمشاهدين كبيرة أوي، لأنهم كلهم حافظين الجمل فيه، وأنا.

- فيلم الجزيرة لما نزل كسر الدنيا، وشريف عرفة كان عامل ملحمة كبيرة، وإن في قصة حب مستحيلة وصراع درامي في الصعيد فظيع، وكل العوامل تؤهل لنجاح هذا الفيلم.

- مكنتش حابة أموت في فيلم "إبراهيم الأبيض" ولا السقا.

- في فيلم "الفيل الأزرق" كان نفسي أفضل عايشة عشان أعمل الجزء الثالث، شكل مروان حامد دايما بيحب يموتني في الأفلام.

- في مسلسل "عايزة أتجوز" كان نفسي نهايته تكون بجوازي .