من "أنا كلي ملكه" لـ"كنت بحب سرطان".. ماذا قالت شيرين عن حسام حبيب قبل وبعد الطلاق؟

كتب- عبد الفتاح العجمي:

مازالت أخبار الفنانة شيرين عبد الوهاب تتصدر المؤشرات عبر محرك البحث "جوجل" وكافة مواقع التواصل الاجتماعي، في فترة أعلنت فيها انفصالها رسميا عن الفنان حسام حبيب، وظهرت فيها لأول مرة عقب الطلاق وهي حليقة الشعر في حفلها الغنائي في مدينة أبو ظبي.

شيرين تزوجت من حسام حبيب في 7 أبريل 2018، ومرت علاقتهما بالعديد من المراحل (يمكنك التعرف عليها من هـــــــنــــــا )، وخلال فترة زواجهما أدلت بتصريحات حول الزوج والحبيب، وعقب إعلان الطلاق أدلت بتصريحات أخرى حول "السرطان" الذي كانت تعيش معه، كما وصفته.

في السطور التالية، نرصد تصريحات شيرين عبد الوهاب عن حسام حبيب في فترة زواجهما، وتصريحاتها عنه عقب إعلانها الانفصال.

أثناء الزواج

في 28 يونيو الماضي، قالت شيرين عبد الوهاب، في فيديو نشرته عبر "تويتر"، عن زوجها حسام حبيب: "حسام جوزي إنسان من أنضف رجالة الدنيا، وإنسان محترم ومتربي وبيحبني أكتر من نفسه، وميستاهلش كم القسوة ده منكم".

تابعت: "حسام حبيب ربنا حطه في طريقي في وقت أنا كنت فيه متكسرة ومتدمرة، هو بنالي شخصيتي وخلاني بقيت بعرف أتكلم ورجعلي لنفسي تاني الثقة.. حسام ربنا هو اللي بعتهولي، وربنا مش هيعملي حاجة وحشة، وحسام بيحبني أكتر من نفسه أنا وبناتي".

أضافت: "حسام حبيب من ساعة ما اتجوزني مستفدش بأي حاجة، ومعملش لنفسه أي حاجة.. حسام عايش معايا بس عشان يخاف عليّا وعلى عيالي من كل شيء".

استكملت: "حسام إنسان نقي ونضيف وربنا هو اللي بعتهولي.. حسام راجل عظيم وأمه ست عظيمة، وبتمنى منكم تدعولنا بالذرية الصالحة".

واصلت: "مفيش أي توكيلات باسم حسام حبيب، والفيز بتاعتي مش معاه، لأن أنا كلي كده بتاعته.. أنا جوزي راجل متأصل وابن ناس ومن عيلة محترمة أوي أوي، ومقبلش أن حد يتكلم عنه كده لا هو ولا أمه".

استطردت: "حسام حبيب راجل مفيش منه خلاص، والناس اللي زيّه مبقوش موجودين.. وبالعقل كده، إحنا بقالنا 4 سنين متجوزين، لو كان فعلا راجل عايز يستفيد مني كان عمل حتى غنوة سينجل لنفسه، الناس لازم يبقى عندها عقل وتشوف".

أوضحت: "حسام حبيب راجل صايني وصاين عيالي، وكل الناس بتتخانق وتختلف، لكن هو بيحبني أكتر من نفسه.. أنا ربنا مديني قلب، وحاسة أنه بيحبني، وحاسة معاه بالأمان".

اختتمت: "حسام حبيب مضرنيش، حسام بالعكس فادني، وكفاية أنه طلع من حياتي كل الناس اللي كانت بتستغلني بجد.. حسام طلع كل الثعابين اللي كانت في حياتي وبتستغلني والحاجات الفاسدة".

بعد الطلاق

أدلت شيرين عبدالوهاب، بعدد من التصريحات خلال حوارها مع الإعلامية اللبنانية نضال الأحمدية، عقب إعلانها الانفصال عن حسام حبيب، نُشرت يوم السبت 11 ديسمبر 2021.

وقالت شيرين في تصريحاتها إنها تحتاج لـ"معجزة من عند الله" حتى تعود لحسام حبيب، وردت على تصريح والده بعودتهما مرة أخرى قائلة: "اخص.. كلام كدب وافتراء".

أضافت: "أنا ما بدي ولد ابن أمه، أصله الحيلة الدلوعة عايز كلمته مسموعة"، متابعة: "من شدة التعنيف النفسي جربت الانتحار، لكن لسه ربنا مش عايزني دلوقتي".

استكملت: "أنا ذليت الجمهور، وجمهوري صبر عليا 4 سنين، أنا مين عشان أذلهم.. وأنا نفسي أعمل حاجات كتير لأهل لبنان، بس أنا شحاتة ومحتاجة معونة".

تابعت: "اللي أنا فيه صعب أوي ومش قادرة أتحمله، تعبت أوي من كل حاجة، وتعبت في العلاقة دي عشان أصريت على حاجة مستحيلة".

استطردت: "أنا عشت طول عمري في دور ماما، وكان نفسي أعيش دور الحبيبة أو الأميرة أو السندريلا.. ارتضيت بده عشان أنا بنت الأصول".

أوضحت: "4 سنين بنام على الكنبة.. نومة الكنبة حلوة، أنا بحب حسام بس أنا بحب سرطان، حب حسام ليا بقا وجع وضعف وخوف وأنا محبش أكون ضعيفة ولا خايفة".

وقالت: "قررت أجمد بويضاتي بس هو أصر يشيلهم بالأجنة بتوعه وفشل موضوعنا، أنا مش عايزة أخلف منه"، مؤكدة أن "حسام شخص مستهتر مش عارف يعني إيه ست تظبط حياتها عشان تدفن في نفس المكان اللي هيدفن فيه"، حسب قولها.

واختتمت: "كنت ضعيفة عشان حبيت وأنا اتربيت زي أي ست مصرية إن الراجل يتشال على الراس، أنا ممكن بوردة بدبلة أنا كده اتجوزت ومؤخر صداقي كان 25 قرش، مين ترضى بكده غير الست المصرية.. رضينا بالهم والهم مش راضي بينا".

"بحب حسام ومش عايزه أخلف منه".. شيرين عبدالوهاب تكشف تفاصيل جديدة عن طلاقها في حوار مع الإعلامية اللبنانية نضال الأحمدية pic.twitter.com/Jfcm59IMDu

— مصراوي (@masrawy) December 11, 2021

شيرين عبدالوهاب تزوجت مرتين، الأولى من الملحن والموزع محمد مصطفى، واستمر الزواج 5 سنوات وأثمر عن ابنتين هما "مريم وهناء"، وتزوجت من حسام حبيب في أبريل 2018 قبل أن ينفصلا في نهاية نوفمبر الماضي.

وكانت شيرين عبد الوهاب، قد أسدلت الستار على قصة طلاقها من خلال بيان صحفي، أكدت فيه طلاقها وانفصالها عن زوجها الفنان حسام حبيب وحسم الجدل المثار حول الأمر، موضحة أن أسباب الانفصال تخصها وحدها ولا داعي للخوض في تفاصيل حياتها الشخصية، مؤكدة أن الانفصال حدث في هدوء تام، ولا توجد خلافات بينها وبين طليقها حسام حبيب على الإطلاق، مؤكدة أنها تكن كل الاحترام لحسام حبيب.