حمو بيكا يوضح.. هل يتحدى هاني شاكر ويستعد للغناء في مصر؟

كتب-مصطفى حمزة:

كشف مؤدي المهرجانات حمو بيكا حقيقة ما تردد عن إعلانه تحدي الفنان هاني شاكر نقيب المهن الموسيقية، وتأكيده عودته إلى الغناء في مصر، رغم إصدار نقابة المهن الموسيقية قرارا بمنع التعامل معه.

مؤدي المهرجانات حمو بيكا، نشر عبر صفحته الرسمية في موقع "فيسبوك"، بيانا قال فيه: "في البداية صباح الخير على كل أخواتي وجمهوري في مصر والوطن العربي، حابب بس أوضح كام نقطة كده الصحافة عمالة تتكلم فيهم بدون أي دليل وكلام مخرجش من لساني وتحريف لبعض الكلام، لإشغال الرأي العام والسوشيال ميديا، أول نقطة جريدة من ضمن الجرائد روجت إشاعة إني عملت لايف واتحديت فيه أستاذ (هاني شاكر) ونقابة المهن الموسيقية، وإني هخالف قوانين النقابة وهغني غصب عن القرار".

وتابع: "أنا قلت دي موجة وبإذن الله هتعدي وهنرجع نغني في مصر تاني، مقولتش أنا بتحدى القرار والأستاذ هاني شاكر، لإني خامس مرة اتوقف، وعمري ما خالفت قوانين النقابة نهائي، وكلامهم جميعاً وعلى رأسهم النقيب هاني شاكر، فياريت الجرايد اللي بتحور الأخبار على دماغها تكتب اللي بيخرج عن لساني أنا، وميكتبش اللي على دماغهم هما، لأن دي أمانة، مفروض حضرتك كصحفي أو صحفية تؤديها على أكمل وجه، ومن هنا بقولكم أنا عمري ما هتحدى قرار نقابة أو هخالف أي قانون للنقابة وأنا محترم كل قرار للنقابة".

وأضاف بيكا: "تاني نقطة هي هي نفس الجرايد كاتبة إني قلت إن أغلب الموظفين عندي في الشركة مهندسين ومحاسبين، وكل يوم الصبح بجيب لهم طعمية والكلام الفارغ ده، مفيش طبعاً الكلام ده أنا مؤدي مهرجانات إيه دخل المهندسين والمحاسبين بشغلي؟ والكلام ده برضه مخرجش من لساني نهائي، واللي كاتب كده شخص عديم الضمير ولازم فعلياً يتحاسب على اللي عامله، أنا فريقي مكون من موزعين وشعراء وفريق السوشيال ميديا وجرافيك ومونتير وعمال نظافة وبوفيه فقط".

مؤدي المهرجانات حمو بيكا، أكمل موضحا: "أما بالنسبة للمطاعم فعندي عمال كتير الحمد لله، وحاليا بجهز لمطعمي الجديد، وبالفعل في مهندس ديكور لعمل تشطيبات المطعم ومش شغال عندي أو معايا، ده راجل بيؤدي شغله فقط، وطبعاً كل المهندسين والمحاسبين على دماغي من فوق ليهم كل الاحترام والتقدير".

واختتم بيكا: "ياريت كل صحفي وكل جريدة يبطلوا بجد يقولوا كلام يولع الدنيا، لأن بجد دي أمانة وأمانة هتتحاسب عليها قدام ربنا، قولي بالله عليك لما تيجي تقف قدام ربنا هتقوله إيه؟ هتقوله أنا كذبت عشان أركب التريند؟".

نقابة المهن الموسيقية برئاسة النقيب هانى شاكر، أصدرت الشهر الماضي قرارا بمنع التعامل مع عدد من مطربي المهرجانات، بينهم: حمو بيكا، نور التوت، مسلم، عنبة، وأحمد موزة وغيرهم، ويمنع كل من ليس عضوا بالنقابة وغير مصرح له بالعمل لحين تصحيح أوضاعهم بالنقابة واجتياز الاختبارات.