ابنة سيد مكاوي: علمني السواقة وكان بيركب عجل وساق مرة طيارة رغم أنه كفيف (فيديو)

كتب- عبد الفتاح العجمي:

قالت "أميرة" ابنة الفنان الراحل سيد مكاوي، إنه من علّمها قيادة السيارات رغم أنه كفيف، مضيفة: "هو كان بيسوق عربية وكان بيركب عجل وساق مرة طيارة".

تابعت "أميرة" في لقاء مع الإعلامية لميس الحديدي مقدمة برنامج "كلمة أخيرة" عبر قناة ON: "هو كان بيحب يعرف كل حاجة، كانت أمي هي اللي بتسوق، وزمان لما كنت صغيرة كانت العربيات بتتسخن لسه، فكان هو ينزل الأول يقعد في العربية ونستنى أمي على بال ما تلبس وتتشيك، فكان يقولي طيب دوّري العربية عشان نسخنها، وخطوة خطوة ابتدى يعرفني كل حاجة في العربية وإزاي أسوق لحد ما اتعلمت، كان رجل عظيم".

استكملت: "كان عندي أب مختلف أوي، نظرا لظروفه أنه مش بيشوف، أنا عشت فترة متخيلة إن أنا اللي بساعده ولكن اكتشفت أن هو اللي كان بيساعدنا طول الوقت، كان مثقف جدا ومفكر جدا وساخر جدا، كان معلما كبيرا دون أن يقول افعل ولا تفعل، عمري ما شوفته بيزعق، وعقابه كان الخصام، وأنا لحد 6 سنين من عمري كنت فاكرة أنه بيشوف لأنه كان بيعمل كل حاجة في البيت".

سيد مكاوي مطرب وموسيقار مصري راحل، من مواليد 8 مايو 1926 في القاهرة، فقد بصره في سن مبكرة، اتجه لحفظ القرآن الكريم وأداء الآذان في المساجد، سُجل كمطرب في الإذاعة المصرية في مطلع الخمسينيات، أثرى الحياة الفنية الموسيقية بمشاركته في تلحين موسيقى العديد من الأعمال الفنية المتنوعة ومنها موسيقى أفلام: "أشجع رجل في العالم، الزوجة الثانية، عنتر يغزو الصحراء"، ومسرحيات: "سكر زيادة، الشبعانين، الليلة الكبيرة" وغيرها، ورحل عن عالمنا في 21 أبريل 1997.