جمال العدل: محمد رمضان لما بيجي عندي المكتب بيوزع فلوس على 200-300 واحد في الشارع

كتب- عبد الفتاح العجمي:

قال المنتج جمال العدل، إنه قدّم الفنان محمد رمضان للجمهور لأول مرة في مسلسل "في أيد أمينة" مع النجمة يسرا عام 2008.

وأضاف العدل، خلال حواره ببرنامج "السيرة" عبر قناة "dmc": "هو فكرني إن وقت المسلسل البعض كان بيرخم عليه فأنا قولتلهم (الواد ده هيبقى نجم مصر الأول).. محمد كان شاطر جدا ودؤوب ومازال".

تابع: "هو بس اختياراته وبعض تصرفاته بقت هوجاء زيادة عن اللزوم، في حملة تشويه ضده وده من أفعاله، وأنا نصيحته كتير، قولتله أنت اللي بتدي الناس سلاح يضربوك بيه بسوء تصرفك".

استكمل: "أنا أتمنى أنه كل ما يكبر يهدى، لكن أفعاله دي بتزيد، جايز دي دماغه وناس حباه عشان كده، يمكن في ناس مش طايقاه، لكن الكم الأعظم ما شاء الله معاه وبيعمل أي عمل ملايين بتتفرج عليه، محمد كِبّر وأنا أتمنى أنه يركز أكثر من كده".

اختتم: "غلطة محمد رمضان الكبيرة كانت موضوع الطيار أشرف أبو اليسر، لاسيما وأنا أشهد له أنه خيّر جدا، محمد لما بيجي المكتب عندي وهو نازل بيستناه تحت في الشارع 200-300 واحد الساعة 1 بالليل وبيوزع عليهم فلوس كل مرة، بقول ده بكل صراحة وده شوفته بعيني كتير، هو جدع وخيّر ولطيف".

وخاض المنتج جمال العدل السباق الدرامي الرمضاني الماضي من خلال مسلسلي "حرب أهلية" ليسرا وباسل خياط، و"ضد الكسر" لنيللي كريم ومحمد فراج.