"إداني بالروسية إديته بالدماغ".. عايدة رياض تكشف كواليس فيلم اللعب مع الكبار (فيديو)

كتب- وائل توفيق:

كشفت الفنانة عايدة رياض كواليس فيلم "اللعب مع الكبار" مع الفنان عادل إمام، وذلك أثناء استضافتها في برنامج تلفزيوني على فضائية "الحدث".

قالت عايدة رياض: "كنت عايز اشتغل معاه بأي شكل، ومرة كنت في البلاتوه قدامه، بصور فيلم الجبلاوي مع الفنان كمال الشناوي، وكان هو في البلاتوه التاني، وكان نفسي أكلمه، وأنا بتكسف، عايز أدخله ومترددة، فات يومين، وفي اليوم التالت، كنت رايحة الكانتين، لقيته واقف، قولت بس هي فرصة تبقى كده صدفه لوحدها".

وأضافت: "قمت لافة، قولتله إزيك يا أستاذ عادل، عامل إيه؟، قالي أهلا يا عايدة؟، قولت كويس إنه عارف اسمي، بقيت مبسوطة، قالي على فكرة، شفتلك فيلم أحلام هند وكاميليا، قولتله بجد؟، قالي وعجبتيني جدا جدا، قولتله، طب يا أستاذ عادل، مش تديني الباسبور؟، هو ذات نفس مخدش باله، قولتله، الشغل مع حضرتك يا أستاذ عادل، قالي، أول ما تيجي حاجة مناسبة، عنيا ليكي يا عايدة".

واستكملت: "وفي فيلم اللعب مع الكبار، ضربني علقة جامدة، دي باينة جدا، طبعا أنا كنت رد فعل، الأستاذ عادل كان هو اللي بيقود المشهد، وعملنا بروفة كده خفيفة، والمخرج شريف عرفة، قال هتمشوا من هنا، ففوجئت بعادل إمام بيديني بالدماغ، فإديته بالروسية، أنا كنت رياضية، المشهد علقة سخنة".