ناعومي كاواسي: كورونا أثرت على صناعة السينما واليابانيون يرتدون "الماسك" حتى الآن

كتبت- منى الموجي:

أكدت المخرجة اليابانية ناعومي كاواسي، رئيس لجنة تحكيم المسابقة الدولية في الدورة 44 لمهرجان القاهرة السينمائي الدولي، إنها تحرص على وضع الممثلين في بيئة تصوير العمل قبل انطلاقه بـ10 أيام أو أسبوع على الأقل.

وتابعت في ندوة أقيمت لها اليوم الاثنين على مسرح النافورة: "علاقتي بالممثلين بخليهم يعيشوا الفيلم قبل ما نصور، يروحوا قبل التصوير يعيشوا الطبيعة، يزرعوا، ياخدوا أولادهم للتسوق في المكان ده، لحد ما يتعودوا ويكون فيه ألفة بينهم وبين المكان، بتابع التصوير من خارج مكان التصوير، فقط المصور بيكون معاهم، ولا أسمح بوجود أي شخص في موقع التصوير ليس له دور".

وتعتبر ناعومي أن التعامل مع الممثلين المبتدئين أفضل من التعامل مع المحترفين، موضحة: "لما بتعامل مع ممثلين مبتدئين وغير محترفين ده افضل، بيطلع المشاهد بشكل أفضل، لما بيكون الممثل محترف وعنده فكرة بيبقى مركز على السيناريو، جاي لابس اكتر من اللي أنا عايزاه، لكن المبتدئ أنا بوجهه وبيستجيب أسرع".

وعن التأثير الذي أحدثه انتشار "كورونا- كوفيد 19"، قالت "أثرت جدا على كل حاجة في العالم، وأثرت طبعا على الأفلام وصناعتها، لكن لاحظت أن المصريين لا يرتدون الماسك، البعض فقط أعتقد انهم يابانيين، اليابان حتى اليوم ترتدي الماسك، وفيه حاجات كتير تحولت أنها ممكن تتعمل عبر الانترنت، بس التواصل الحقيقي لازم يكون على أرض الواقع، التواصل من خلال الإنترنت مش بيوصل المشاعر".