"دا وشي".. وفاء سالم ترد على الجدل المثار عن تشوه ملامح وجهها "فيديو"

كتب-مصطفى حمزة:

تصدرت الفنانة وفاء سالم، قوائم تريند موقع البحث جوجل، عقب الجدل المثار عبر مواقع التواصل الإجتماعي، حول تشوه ملامح وجهها بعد خضوعها لعمليات التجميل.

وفاء، حرصت على توجيه رسالة إلى محبيها، و طرحت مقطع فيديو عبر حسابها في موقع فيسبوك، وقالت ،:"أشكر الناس اللي حريصة انها تطمن عليا، اطمنوا، الحمد لله رب العالمين، انا تمام، ده وشي ودي ملامحي".

وتابعت ،:" أكتر حاجه خرجت بها من هذه المحنة، أن حبايبي كتير، ودعواتهم لي كثيرة، ده عزيز جدا على قلبي، تحياتي للجمهور العزيز".

وفاء، نشرت مؤخرا، صورًا لها قبل وبعد التجميل، عبر حسابها الشخصي بموقع "فيسبوك"، وعلقت قائلة: "على فكرة الصورة اللي فوق واضح الفوتوشوب التكبير في السن لأن الصورة اللي تحت كانت قبل العملية بكام يوم في فرح العالم الأثري الدكتور علي أبو دشيش".

وفي مداخلة هاتفية مع الإعلامي عمرو أديب في برنامجه "الحكاية"، قالت وفاء، : "أنا على مدار كذا سنة تعرضت لحقن وخيوط عند دكاترة كبيرة مشاهير، وكنت كل مرة أروح لدكتور على أساس يصلحلي غلط اللي قبله".

وأضافت: "كل مرة كنت بتفرج على النتيجة، ألاقي تشوهات في وشي، والناس كانت بتتكسف تقولي، حتى كان أدائي مضايقني جدا، إزاي كمملثة وأنا في تشوهات في وشي، لغاية إني وصلت لمرحلة، إني مش هروح لأي دكتور، لإني كل ما أروح لدكتور يقولي احنا مش هنقدر نعمل أي حاجة".

وتابعت: "أنا دلوقتي بوري وشي لحضرتك من غير أي فلاتر ومن غير أي ميك أب، المناطق اللي في وشي أغلب الأساتذة قالولي مش هنقدر نتدخل لإنها مناطق أعصاب. لحد ما ربنا كرمني وقابلت دكتور س.غ، أنا ما كنتش فاهمة لما قابلته قالي احنا محتاجين نعمل إشاعة للمنطقة دي".

وأكملت: "الدكتور عمل العملية وصورها لي فيديو، لقى إن الصديد واصل للشبكية وللمخ، الحمد لله ربنا أنقذني، أنقذ حياتي، بعيدا عن إني همثل أو مش همثل، الحمد لله إنه أنا تجاوزت دا".

وأردفت: "الصديد اللي حصلي كان من الحقن، وكان في خيوط جوا وشي، أنا تعرضت لطول الوقت لشكل من أشكال الابتزاز، وكان نفسي إن دا ما يحصلش".

واستطردت: "أنا رجعت بنسبة كبيرة جدا لشكلي، رجعلي وفاء، أنا عايزة وفاء اللي الجمهور حبها".