سوسن بدر: كليوباترا ذكية ومحبة لمصر و"أم الدنيا" من أمتع الأعمال

كتبت- منى الموجي:

وصفت الفنانة سوسن بدر في حوارها مع الإعلامية منى الشاذلي بحلقة جديدة من برنامج "معكم"، الملكة كليوباترا بالشخصية الذكية المحبة لمصر.

وتابعت ردًا على سؤال إذا ما كانت متعاطفة مع كليوباترا أم تقف ضدها: "كانت شخصية ذكية ومحبة لمصر وعملية ومش عاطفية خالص، ومش مدلوقة على أي حد، كانت بتشوف مصلحة بلدها فين ودي حاجة غريبة جدا، الناس لما تشوف حلقتها هتلاقيها بتحكم بتدبر وتفكر كحاكمة متقعش عشان تحت إيد الغزاة، وست حلوة بمنظور الفترة دي".

وأضاف محمود رشاد كاتب ومخرج "أم الدنيا" المعروض على منصة واتش إت: "ميزة كليوباترا مش في شكلها، والهدف إن الناس تشوفها على حقيقتها لإن قصتها اتكتبت من العدو اللي قتلها، وحصل تحريف في كينونة الست دي لمصلحتهم، مكانتش بتغوي الرجال كما قيل، بالعكس كانت متحضرة ومتعلمة ومثقفة جدا جدا".

وعن مشاركتها في أم الدنيا، عادت سوسن بدر لتقول "من أمتع الأعمال في كواليسه، لأنه مع مجموعة لطيفة جدا كل الفريق، في غاية اللطف وقضينا وقت من أمتع الأوقات، وكنا بنضحك كتير وكلنا جالنا ضربة شمس في نفس اليوم".

"أم الدنيا" عمل وثائقي تاريخي، تم عرض موسمه الأول على منصة واتش إت ويحكي تاريخ الحضارة المصرية القديمة في 15 حلقة.