"اشتغل بعيد عني".. قصة موقف محرج جمع رضا حامد بـ"الزعيم" عادل إمام

كتبت- منى الموجي:

تحدث الفنان رضا حامد عن تصريحاته السابقة عن "الزعيم" عادل إمام، والتي أشار فيها لموقف محرج تعرض له، عندما طلب أن يشارك في الأفلام التي يؤدي بطولاتها النجم الكبير.

وأكد رضا أنه لم يندم على ما قال لأنه حدث بالفعل، مضيفا في حواره مع الإعلامية راغدة شلهوب في برنامج "نص الكلام" والمعروض على قناة "النهار": "لو قلت كلام مش حقيقي هبقى وحش أوي، ولو قلت كلام حقيقي هندم ليه، خاصة وإني لم أجرح الأستاذ عادل إطلاقا ولم أقل عليه إلاأانه رمز من رموز الفن الشامخ، ورحلته عظيمة ويكاد يكون هرم محصلش في الفن، ولما أقول موقف حصل بيني وبينها ابقى وحش، هو نجم كبير ومن حقه يحافظ على نجوميته بطريقته، شايف ان رضا هيعمله قلق مع السلامة بقى".

وتابع "معرفش بقى دي تركيبة متعود عليها من صغره ومحافظ عليها، لكن أنا اشتغلت مع الفنان سمير غانم، وكان بيقولي حاجات ويخليني أعمل اللي أنا عايزه ويزودلي ما تقول هنا كمان كذا، لكن أستاذ عادل كنت بعمل حاجات معينة متفقين عليها نعملها".

وأشار أنه ارتجل في المسرحية التي كانت تجمعه بالزعيم، ولكن عندما كان يقف أمام الفنان سعيد عبدالغني، ووقتها يكون عادل في غرفته، يحكي "قعدت ارتجل وعملت حاجات كتير جدا، الفترة دي بيبقى في غرفته كنت أمام الفنان الراحل سعيد عبدالغني، ولقى ضحك جامد جدا كان بيجي يشوف ايه الحكاية، وده طبعا بيقلقه وده اللي سمعته من جميع الناس اللي حوالينا، وميقوليش أبدا، لكن في يوم مسكني من كتافي وقالي واد يا رضا انت ممثل جامد اوي.. ربنا يديله الصحة ويحافظ عليه لأنه هرم شامخ محدش يزايد عليا ولا على حبي لأستاذ عادل إمام".

وحكى رضا "قبل عملي مع أستاذ عادل، كنت بعمل بروفات مسرحية من بطولتي وأنا اللي جايب البطلة قالولي أستاذ عادل عاوزك، والمخرج بتاع المسرحية بتاعتي قالي روح هتشتغل معاه في كل الأعمال، وفعلا روحت بس مشتغلتش معاه غير فيلم واحد، رغم إن فترة المسرحية عمل 8 أفلام مجابنيش فيهم، وطلبت منه قلتله عايز اشتغل قالي لأ خلاص اشتغل بعيد عني أنا قدمتك يا رضا واشتغل بعيد عني".

رضا حامد شارك في مسرحية "بودي جارد" بطولة "الزعيم" عادل إمام، وكذلك ظهر معه في فيلم "أمير الظلام".