"أفلامي الأخيرة بتعبر عني" أحمد حلمي يكشف كواليس تحضير فيلم "واحد تاني"

كتب- وائل توفيق:

كشف الفنان أحمد حلمي عن كواليس تحضير فيلم "واحد تاني" مع المؤلف هيثم دبور.

وقال في مداخلته الهاتفية لراديو "إنرجي": " هيثم أنا أعرفه من فترة، من قبل كده بكتير، وكنا دايما بتبادل الآراء، وكان بيبعتلي كتابات مش ليا خالص أقوله رأيي فيها، وكان بيعجبني قوي طريقه تكفيره وكتاباته، وأنا مش بصنفه مش بس سيناريست أو كان بدايته كصحفي أنا بصنفه راجل روائي بيكتب روايات ليها طعم خاص".

وتابع: "لما بكون محدد الخطوة الجاية تكون كوميدي، خلاص بيبتدي تفكيري يروح إني هعمل إيه كوميدي، بعد كده أنا بدور على العنوان الرئيسي قبل ما أدور على التصنيف أحيانا، لإن ممكن أبقى عاوز أتكلم عن شيء معين، ديما أنا ببتدي المشاريع كده، أنا جيت قولت أنا في الفيلم هتكلم، عن إحنا ليه بنفقد الشغف بعد شوية، وديما بيقولوا الأفلام بتبقى شبه مخرجينها، وعند ناس كتير قوي الأفلام بتبقى شبه ممثلينها، أو بتكلم عن نفسي شخصيا، بتبقى تجارب شخصية، بقعد أشوف نفسي، لما بحس إن في كلكيعة عندي، بابتدي أبص حواليا هل هي كلكيعة عامة، ولا كلكيعة شخصية، عشان برضه الفيلم إنت بتعمله للجمهور، في الحقيقة لقيت ناس كتير قوي عندها الأزمة دي، بيحب يقعد على الكنبة".

وأضاف: " من هنا جات الفكرة، من هنا أنا بحاول أعمل مشاريعي، والأفلام الأخيرة بالتحديد، بيعبروا عني".

"واحد تاني" من تأليف هيثم دبور، إخراج محمد شاكر خضير، بطولة أحمد حلمي، روبي، عمرو عبدالجليل، نسرين أمين، سيد رجب، أحمد مالك، نور إيهاب.

جدير بالذكر أن فيلم "واحد تاني"، يعيد أحمد حلمي للسينما بعد غياب حوالي 3 أعوام، منذ آخر أفلامه "خيال مآتة" الذي عُرض في أغسطس 2019، بطولة منة شلبي، حسن حسني، خالد الصاوي، بيومي فؤاد.