"جوزي لا يمكن يتجوز عليا وبروح لطبيب نفسي".. أبرز تصريحات وفاء عامر في عيد ميلادها

كتبت- بهيرة فودة:

تحتفل الفنانة وفاء عامر بعيد ميلادها اليوم 25 مايو الجاري، إذ أنها مواليد عام 1968.

وفاء عامر شاركت فيما يقرب من 170 عملًا بين السينما والتليفزيون على مدار مسيرتها الفنية.

وفي هذه السطور نعرض لكم أبرز تصريحات وفاء عامر لال حوارها مع الإعلامية لميس الحديدي ببرنامج "كلمة أخيرة" المذاع عبر قناة ON، قبل أيام.

الزوجة الثانية

كشفت النجمة وفاء عامر، عن مشاعرها في مشهد صدمتها بعد علم "يسرية" الشخصية التي قدّمتها في مسلسل "راجعين يا هوى"، بزواج زوجها الراحل من أخرى في السر.

وقالت عامر: "لقيت نار طالعة من جسمي، واحد عاش معايا 27 سنة وفجأة بيقولولها إنه كان متجوز عليها، نار وصواريخ بتطلع، قولتلهم محدش يحطوا إيده عليّا".

وبسؤالها عن شعورها حال تعرضها لنفس الموقف من زوجها المنتج محمد فوزي؛ قالت: "ميقدرش.. لأ.. لا يمكن.. مش هتحصل.. لا يمكن.. ولو حصلت هبقى أنا السبب.. أنا السبب.. آه.. وهتبقى هي الغلبانة واضحك عليها.. أصل أنا ست بيت وممثلة كويسة وبحب شغلي وبيتي ومخلصة لأسرتي بالكامل.. يتجوز ليه؟ ناقصه إيه؟ جوزي لأ، لا يمكن".

الفول والطعمية

أضافت: "إحنا عيلة عادية، بناكل ونشرب زي الناس عادي، بنقعد في البلكونة، بنتصور وإحنا مش حاطين ميكاب، وممكن ناكل فول وطعمية زي الناس العاديين، عادي على فكرة".

وتابعت: "إحنا والإعلاميين بيطلع علينا شائعات كتير، إننا بناكل الجنيهات الدهب ونحلي بحاجات كده، والكلام ده مش حقيقي".

استكملت: "حكم الناس عليا ميهمنيش، أصل مش هيبطلوا يرغوا، مش هيبطلوا يتكلموا ليوم الدين، أنا في حالي، وبخاف من ربنا، طول ما أنا صح هرفع راسي.. يا فاحت يا نازل.. يا باني يا طالع".

إصابة خالد النبوي

وكشفت وفاء عامر، عن تسببها في إصابة الفنان خالد النبوي خلال أحد المشاهد التي جمعت بينهما في مسلسل "راجعين يا هوى" الذي عُرض في رمضان 2022.

وقالت عامر: "أنا حصلي مصيبة سودة في المشهد، وقعدوا يعالجوني، عملنا بروفة بساطور يستخدم في التمثيل، وتحولت لـ(يسرية) في لحظة، وبقيت بضرب جامد وبخبط، وفجأة شوفت صوابع خالد بتطير في الهوا في خيالي، وفضلت أتنطط على الأرض".

وأضافت: "خالد اتخدش في إيده، وفضل يهديني ويقول متخافيش أنا كويس صدقيني مفيش حاجة، دي نقطة دم"، موضحة أن المخرج محمد سلامة استطاع إثارة اهتمامها بالدور من خلال معرفته بحبها الشديد للطبخ، لتظهر في المسلسل في العديد من المشاهد التي كانت تطبخ فيها وتشرح طريقتها الخاصة في الطبخ لخادماتها.

الطبيب النفسي

وكشفت عامر، عن حرصها على الذهاب لطبيب نفسي بسبب عملها، وقالت: "أنا بروح لدكتورة نفسية، وأنا أعتبرها صديقة، وبروحلها ساعات البيت، وبتساعديني جدا إني أعدي مراحل في حياتي".

وأضافت : "مشاكل الشغل بتأثر على حياتي، أنا مرة لعبت دور واحدة فقيرة واتغنت، ماما لحد دلوقتي بتقولي أني بعمل بسبب الدور حركة غريبة، كنت بقعد أفرك الفلوس وأنا بعدها، لحد دلوقتي أنا بعمل كده، وكمان العصبية الزايدة والصوت العالي وغيرها".

وحققت الفنانة وفاء عامر نجاحًا في موسم رمضان 2022، حيث شارك في عدة أعمال تلفزيونية منها "جزيرة غمام، بيت الشدة، راجعين يا هوى".

ومن أشهر أعمال وفاء عامر السينمائية أفلام : خان تيولا، شريط 6، كارما، الليلة الكبيرة، يا تهدي يا تعدي، كف القمر، حسن ميسرة، علمني الحب.