"الممثل المثالي".. عمرو سلامة يوجه رسالة لـ ماجد الكدواني

كتب- هاني صابر:

حرص المخرج عمرو سلامة، على توجيه رسالة خاصة للفنان القدير ماجد الكدواني.

ونشر عمرو، صورا تجمعه مع ماجد الكدواني، عبر حسابه على إنستجرام، وعلق: "من حظي إن أكثر ممثل اشتغلت معاه هو الأستاذ ماجد الكدواني، ثلاث أفلام على مدار ١٣ سنة، أسماء وشيخ جاكسون وبرا المنهج".

وتابع: "من بعد أول تعامل في فيلم (أسماء)، وأنا كل مشروع لما بخلص كتابته - وساعات وأنا في نص الكتابة - من أول الأسئلة اللي بسألها لنفسي، ماجد الكدواني ممكن يمثل أنهي دور في الفيلم".

وأوضح: "ولما اتكلمت مع كذا مخرج صديق من اللي بيشتغلوا معاه، لاقيت التجارب مشابهة وانطباعنا تجاهه يكاد يكود متطابق، كلنا شايفينه الممثل المثالي اللي يتقاس عليه".

واستكمل: "هو الممثل المثالي، لإن عنده الأربع عوامل اللي صعب جدا يتحدوا في ممثل واحد: الموهبة، الاحتراف، الأخلاق، الكاريزما.. ممكن تلاقي ممثل موهوب جدا بس مش محترف، مش بيحترم مواعيده ولا عارف حدود مهنته ولا بيدي وقت وتركيز وجهد كافي لشغله".

وتابع: "ممكن يكون موهوب ومحترف بس أخلاقه مش تمام، عنده غيرة سلبية، يضايق زمايله، يعامل الناس بشكل سخيف، عنده غرور وإحساس بالفوقية، مش واضح وصريح ويلف ويدور وإلخ .. ممكن يبقى موهوب ومحترف وأخلاقه رائعة، بس الناس ببساطة مش بتحبه، لو اتنطط في حاجز نفسي بينه وبين الناس".

وأَضاف: "ماجد عنده الأربعة، علشان كده هو جوهرة ثمينة نادرة، وطبعا في ممثلين تانيين كتير يتوافر عندهم الأربع عوامل وأكثر، لكن ماجد بالذات بطيبته وبحنيته وبعينيه وهي بتلمع لما الكاميرا تدور، بخوفه كطفل صغير على شغله، بإحترامه للجميع بشكل بشوفه ساعات مرهق ليه، بيخليه له حتة كبيرة في قلبي وأتحدى إنها كمان في قلب كل اللي إشتغل معاه".

يذكر أن آخر أفلام المخرج عمرو سلامة "برا المنهج"، وهو بطولة ماجد الكدواني، الطفل عمر شريف، روبي، دنيا ماهر، أسماء أبو اليزيد، وظهر كضيف شرف في الفيلم أحمد أمين.

View this post on Instagram

A post shared by @amrmsalama